Bashkia e Tiranës prej 20 prillit ka çelur thirrjen e aplikimit për kreditë e buta dhe kjo fazë e parë përfundon më 19 maj të këtij viti.
Drejtori i Mbrojtjes Civile dhe Shërbimeve për Qytetarin në bashkinë e Tiranës, Dritan Dango i ftuar në “Mirëmëngjes Shqipëri” bëri të qartë për qytetarët se faza e parë do të kryehet në mënyrë elektronike përmes e-Albania.
Ai sqaroi më tej disa nga kriteret që do duhet të plotësojnë qytetarët për të përfituar kreditë e buta, duke nënvizuar se: aplikantët do duhet të jenë mbi moshën 18-vjeç, të kenë sigurime shoqërore, një pagë e cila nuk e kalon kufirin e të ardhurave sipas planit social, etj,.
Dango theksoi se të drejtën e aplikimit e kanë të gjithë qytetarët nga persona individualë e deri te familjet, por pa prona dhe biznese.
“Të gjithë qytetarët që kanë dëshirë për të aplikuar e kanë në dorë. Është online faza e parë nga data 20 prill deri në 19 maj në e-Albania. Ka disa kritere: duhet të jesh mbi 18-vjeç, duhet të kesh sigurime shoqërore, duhet të kesh një pagë që nuk e kalon një pjesë të të ardhurave sepse kalon planin social. Kanë të drejtë të aplikojnë të gjithë, nga personat individual te familjet, dhe që nuk kanë prona dhe biznese.
Në faqen zyrare të Bashkisë së Tiranës mund të gjej të afishuara kriteret e hollësishme.
Deri më 19 maj është faza e parë e aplikimit që bëhet elektronikisht, vetë algoritmi i e-Abanias bën skualifikimet nëse kalojnë kuotën e caktuar minimale të pagës. Familjet me ndihmë ekonomike, gratë e divorcuara me fëmijë, gratë e veja që janë kryefamiljare, familjet që kanë pasur dëshmorë, që përfitojnë nëse do bëjnë kërkesë për kredi të butë”, deklaroi Dango.
Pas përfundimit të fazës së parë më 19 maj, drejtori i Mbrojtjes Civile dhe Shërbimeve për Qytetarin njoftoi fazën e dytë e cila lidhet me dorëzimin e dokumentacionit, detaje të cilat do të njoftohen më pas nga autoritetet lokale të bashkisë.
Ai sqaroi se është një komision i cili do të kalojë në duar kriteret në rast se numri i aplikimeve në fazën e parë do të kalojë kufirin prej 1500-të.
“Pas kësaj faze, nis faza e dytë për dorëzimin e dokumenteve, vërtetimi i pagës, etj, që do dalin dhe do njoftohen nga autoritetet lokale të bashkisë. Është një komision më pas që sheh kriteret se mund të kualifikohen më shumë se 1500 kredi, atëherë shihen dhe kriteret”, theksoi Dango teksa këshilloi qytetarët se në rast të ngarkesës së sistemit e-Albania, të ritentojnë për upload-in e dokumentacionit.
“Ka raste kur aplikacioni i e-Albanias ngarkohet shumë. Ka shumë njerëz të cilët futen për të marrë dokumente dhe nuk ju merr aplikimin, do duhet ta tentojnë në moment tjetër“, përfundoi ai.
