Kryeministri i Kosovës, Albin Kurti, ka mbajtur një konferencë për media sot në 5 mars, pas zhvillimeve të fundit politike në vend. Gjatë paraqitjes së tij para gazetarëve, ai theksoi se në rrethanat aktuale politike nuk është e mundur të diskutohet për mbajtjen e zgjedhjeve të reja, duke theksuar se situata kërkon fillimisht një sqarim nga institucionet kushtetuese.
Kurti kritikoi partitë opozitare për mospraninë e tyre në seancën e fundit të Kuvendit, ku pritej të niste procesi për zgjedhjen e presidentit. Sipas tij, mungesa e deputetëve opozitarë dhe e përfaqësuesve të Listës Serbe bëri që seanca të mos arrijë të zhvillojë as raundin e parë të votimit.
Ai theksoi se deputetët kanë detyrim kushtetues që të marrin pjesë në punën e Kuvendit dhe të ushtrojnë mandatin për të cilin janë zgjedhur nga qytetarët.
“Ky proces nuk arriti ta konsumojë as raundin e parë meqë mungoi opozita dhe partia që dirigjohet nga Beogradi, Lista Serbe. Të gjithë e keni parë pamjen e seancës, kush ishte, ishte në qendër, kush nuk ishte në qendër, nuk ishte fare, se nuk erdhi. Asnjë deputet që mungoi, nuk e njoftoi kryetaren e Kuvendit. Është obligim kushtetues i deputetëve të kryejnë detyrën e tyre, për çfarë i ka zgjedhur populli i Kosovës dhe të vijnë në vendin e tyre të punës dhe të marrin pjesë e të votojnë. Ndodhemi në një situatë kur nuk mund të flasim për zgjedhje të reja, pa e thënë fjalën e vet Gjykata Kushtetuese”,
Në të njëjtën kohë, Kurti nuk mori pjesë në takimin konsultativ të thirrur nga presidentja e vendit, Vjosa Osmani, ku pritej të diskutohej caktimi i datës së zgjedhjeve të reja. Ky takim erdhi pasi presidentja kishte nxjerrë dekret për shpërndarjen e Kuvendit të Kosovës.
Nga ana tjetër, Lëvizja Vetëvendosje ka paralajmëruar se vendimin e presidentes do ta dërgojë për shqyrtim në Gjykata Kushtetuese e Kosovës. Ndërkohë, edhe kryetarja e Kuvendit ka bërë një kërkesë në këtë gjykatë që të pezullohen afatet kushtetuese, me qëllim që procesi për zgjedhjen e presidentit të mund të zhvillohet brenda afatit prej 60 ditësh.
