Ne kujtojmë dhe do të kujtojmë gjithmonë duke iu qenë mirënjohës të gjithë atyre që luftuan dhe që sakrifikuan jetët e tyre për një botë të lirë, deklaroi sot presidenti polak, Andrzej Duda në ceremoninë për 80-vjetorin e shpërthimit të Luftës së Dytë Botërore.
Në këtë ceremoni ndodheshin zyrtarët më të lartë polakë si edhe 40 delegacione të huaja.
Mes të tjerëve, në këtë ceremoni ishin edhe kancelarja gjermane, Angela Merkel, kryeministri francez, Edouard Philippe, presidentja kroate, Kolinda Grabar-Kitaroviç, ai çek, Milos Zeman, ajo sllovaje, Zuzana Caputova, presidenti ukrainas, Volodymyr Zelenski dhe ai hungarez, Janos Ader.
”Sot është 80-vjetori i një kapitulli të errët të historisë europiane, shpërthimi i Luftës së Dytë Botërore në Poloni, shkaktuar nga Gjermania naziste”, shkruante ndërkohë në Twitter presidentja e zgjedhur e Komisionit Europian, Ursula von der Leyen.
”Duhet të kujtojmë së bashku, t’i mësojmë leksionet tona individualisht dhe të reagojmë së bashku për të ardhmen. Për paqen. Për dinjitetin. Për njerëzimin. Kjo është detyra jonë. Përgjithmonë”, përfundon Von der Leyen, me rastin e 80-vjetorit të shpërthimit të Luftës së Dytë Botërore në Poloni.
Polonia përkujtoi sot 80-vjetorin e fillimit të Luftës së Dytë Botërore që startoi me sulmin e forcave ajrore gjermame, Luftwaffe, kundër qytetit të Vilunit dhe bombardimin e Gadishullit të Westerplattes nga anija gjermane ”Schleswig-Holstein”.
Ceremonitë do të zhvillohen në Vilun, në gadishullin e sipërcituar, në Gdansk dhe Varshavë.
Sipas historianëve, asnjë ushtar polak nuk ishte dislokuar në Vilun kur Luftwaffe sulmoi.
Polonia ka humbur gjashtë milionë persona gjatë Luftës së Dytë Botërore.
/a.rada
