Kroacia do të punojë për të hapur negociatat e anëtarësimit të Shqipërisë dhe Maqedonisë së Veriut me Bashkimin Evropian, teksa vendi mban presidencën e radhës së BE-së për 6 muajt e ardhshëm. Ky është premtimi i kryeministrit kroat Andrej Plenkovic.
“Do të bëjmë më të mirën e mundshme për të kapërcyer problemet dhe për të zhbllokuar procesin, gjë që nuk ndodhi në tetor 2019”, është shprehur kryeministri i Kroacisë Andrej Plenkovic.
Franca dhe Holanda penguan hapjen e negociatave me Shqipërinë dhe Maqedoninë e Veriut në tetor të vitit që lamë pas duke sjellë zhgënjim dhe shqetësim në Ballkanin Perëndimor teksa Rusia dhe Kina përpiqen të ndikojnë në këtë rajon, shkruan Radio Evropa e Lirë.
Kroacia, e cila u bë pjesë e BE-së në vitin 2013, është vendi i fundi që i është bashkuar bllokut. Qeveria kroate e ka listuar zgjerimin e BE-së si një ndër prioritetet kyçe gjatë kryesimit të saj të presidencës së Bashkimit Evropian.
“Konteksti i presidencës sonë është shumë specifik dhe kërkues”, ka shtuar më tej Plenkovic. /e.s/
