Kryeministri i përkohshëm socialist i Spanjës, Pedro Sanchez deklaroi sot se Spanja do të zhvillojë zgjedhje të reja të përgjithshme në muajin nëntor, të katërtat zgjedhje që nga viti 2015, pasi mbreti Felipe VI vendosi të mos i japë atij apo ndonjë politikani tjetër mandatin për të formuar qeveri.
Në një deklaratë televizive, Sanchez u shpreh se në kongres nuk ka shumicë që mund të lejojë formimin e një qeverie, kështu që më datë 10 nëntor vendi do të përsërisë zgjedhjet.
Në një deklaratë të dhënë dje, pas dy ditësh konsultimesh, familja mbretërore u shpreh se as Sanchez, i cili drejton Partinë Socialiste të Punëtorëve (PSOE) dhe asnjë drejtues tjetër i partisë nuk gëzon mbështetjen e parlamentit për krijimin e një qeverie të re.
Sanchez, i cili kishte kërkuar aleancën e Unidas Podemos (UP) për ta mbështetur atë në mënyrë që të parandalonte zgjedhjet e parakohshme, tha se u përpoq në çdo mënyrë për të formuar një qeveri të re, por ia bënë të pamundur.
Udhëheqësi 47-vjeçar është në detyrë që nga qershori i vitit të kaluar, pasi paraardhësi i tij, Mariano Rajoy, i Partisë Konservatore Popullore (PP), humbi votëbesimin në parlament.
/a.r
