Kryetarja e Lëvizjes Socialiste për Integrim, Monika kryemadhi ka deklaruar se protesta e opozitës së bashkuar më 27 maj, nuk do të jetë e dhunshme.
Kryemadhi i bëri apel të gjithë qytetarëve që do të marrin pjesë në protestë, që të mbajnë telefonat me vete, dhe të jenë vigjilentë për të filmuar rastet e provokimeve që mund të ndodhin sipas saj.
“Ftoj gratë dhe vajzat, gazetaret për të protestuar për fyerjen e madhe që Rama i ka bërë medias, duke i quajtur kazan. Prezentë të jenë me familjarët dhe fëmijët e tyre nuk ka për të pasur asnjë dhunë e protestës, e vetmja mund të jetë nga provokatorët, u kërkoj protestuesve të filmojnë cdo provokator, të jenë të kujdesshëm. Dhe ne nga ana jonë do të marrim masat. I bëj thirrje ministrit të Brendshëm, Xhafaj, të jetë i kujdesshëm me deklaratat që lëshon policia se do të ketë probleme, do përballet jo me LSI por me realitetin e dhimbshëm që po kalojnë shqiptarët”- tha ajo.
Të gjitha zërat që kanë qarkulluar në media për dhunë të organizuar nga mbështetësit e Lëvizjes Socialiste për Integrim, zonja Kryemadhi i ka cilësuar thjesht “frikë të kryeministrit Rama”, duke rrëzuar këto pretendime.
“Zoti e ka bekuar protestën e ditës së nesërme me këtë kohë kaq të bukur”, – tha Kryemadhi pas një takimi që pati së bashku me liderin demokrat Lulzim Basha në selinë blu ku ishin të gjithë aleatët e djathtë.
Për protestën është marrë leje në policinë e Tiranës, nga ora 12:00 deri në 16:00.
Opozita kërkon në këtë protestë rrëzimin e qeverisë Rama që sipas saj është e lidhur me krimin, dhe se nga dita në ditë po e varfëron popullin shqiptar./a.m.
