Kryetarja e Lëvizjes Socialiste për Integrim, Monika Kryemadhi ka zhvilluar një takim me strukturat e kësaj force politike në Gjirokastër.
Gjatë fjalës së saj, Kryemadhi i bëri sërish thirrje anëtarëve të LSI që të palosin flamurin e partisë dhe të shpalosin flamurin kombëtar duke iu bashkuar protestës së studentëve. Sipas Kryemadhit, studentët i dhanë një mësim politikës shqiptare me anë të protestave.
“Studentët i kanë dhënë një dimension tjetër jetës politike dhe dimension tjetër i kanë dhënë edhe reagimit qytetar. Ata mbajnë zjarrin e protestës ndezur edhe pse janë me pushime. Ne kemi bërë thirrje që të palosnin flamurin e LSI dhe të shpalosin flamurin kombëtar”, tha Kryemadhi.
Më tej ajo shprehu bindjen se, 30 qershori nuk do të jetë vetëm data e zgjedhjeve lokale, por edhe atyre parlamentare.
“Mos hapja e negociatave për Shqipërinë ishte një sinjal shumë i keq. Nga gjithë informacionet që ne kemi e shikojmë që data 30 qershor do jetë ditë zgjedhje lokale e të përgjithshme”, tha Kryemadhi, e cila u shpreh se parlamenti është shpërbërë.
/a.rada
