Kryetarja e LSI ka dalë pasditen e sotme në një konferencë për shtyp, duke akuzuar qeverinë se ka përdorur dhunë ndaj aktivisteve të kësaj partie.
Monika Kryemadhi tha sot se Rama urdhëroi arrestimin e 8 vajzave të reja. Sipas saj, ato janë dhunuar dhe fyer nga Shefi i Komisariatit të Rinasit.
Në fjalën e saj, kryetarja e LSI tha se “Rama ka hyrë në gjak me rininë shqiptare” dhe se “gjaku i deputetes Floida Kërpaçi nuk do të lahet derisa të largohet Rama…”
Kjo e fundit pretendoi sot se ishte dhunuar nga policia gjatë protestës para Kuvendit.
PJESE NGA DEKLARATA
“S’mund të rri pa përmendur gjakun e deputetes më të re të Kuvendit të Shqipërisë, Floida Kërpaçin. Manipulimi që kërkon t’i bëjë Edi Rama opinionit publik duke thënë se janë goditur policë apo institucione, janë qesharake dhe monstruoze. Ta harrojë se gjaku i Floida Kërpaçit do lahet nga bluza derisa të ikë ai, sot edi rama ka hyrë në gjak me rininë. Derisa të jetë fryma ime ai s’do pijmë kafe i qetë, s’do t’i ndalemi derisa të çlirojmë rininë nga kthetrat e drogës dhe krimit të organizuar”, u shpreh Kryemadhi.
Ajo i kërkoi ministrit të Brendshëm të hetojë shefin e policisë në Rinas, pas ndalimit të tre anëtareve të LRI-së. “Fatmir Xhafaj të hetojë dhe shefin e komisariatit të Rinasit për dhunën dhe fjalorin banal që ka ushtruar ndaj vajzave”/b.d
