Propozimi franko-gjerman që Presidentja Vjosa Osmani mori pasditen e sotme në Moldavi, e që do të ç’tensionote situatën në Veri të Kosovës me zgjedhje të reja lokale në katër komunat me shumicë serbe, ishte temë e diskutimit mes panelistëve në emisionin “Debat” të moderatores Alba Alishani, në A2CNN.
Referuar këtij propozimi, analisti nga Prishtina, Arbnor Sadiku u shpreh se pritshmëritë për zgjidhje janë të ulëta. Kjo sipas tij, për shkak të peshës politike dhe elektorale të papërfillshme që ka Osmani në Kosovë.
Por, ai nënvizoi se mesazhi i dy liderëve kryesorë të Bashkimit Europian do të përcillet më së miri te Albin Kurti, pavarësisht moskoordinimit që u shfaq sot me Kryeministrisë në Prishtinë dhe Presidentes që ndodhej në Moldavi.
“Pritshmëritë kanë qenë të vogla, pasi dihet që Osmani nuk ka autoritet të madh politik në Kosovë, pasi atë e ka kryeministri Kurti dhe VV. Zonja Osmani është si një lloj korrespondente e letrave të kryeministrit Kurtit. Osmani është shfrytëzuar si një kanal komunikimi pasi Kurti ishte refuzues ndaj kërkesave të ndërkombëtarëve. Praktikisht është inkurajues fakti që Presidentja Osmani ka marrë mesazhe të qarta nga Makron dhe Sholz. Ajo do të vijë te Kurti me kërkesa specifike dhe afate kohore se kur mund të shkohet me zgjedhje të reja lokale në komunat në Veri të Kosovës. Ka pasur një jokoordinim të mirë mes Presidencës dhe zyrës së Kryeministrit, në lidhje me takimet që ajo ka zhvilluar atje dhe takimi i Kurtit me ambasadorin e Amerikës”, u shpreh analisti.
Ndërkohë i pyetur nëse do të ketë zgjedhje të reja parlamentare në Kosovë, në varësi të vendimeve që Kurti do të marrë në vijim, Sadiku tha se ato do t’i konvenonin qëllimeve të kryeministrit, pasi do të dilte fitues.
“E para punës nëse vendi shkon në zgjedhje, shkon se për këtë është shumë i interesuar vetë Albin Kurti jo për shkak të opozitës. Së dyti dyshoj shumë se opozita do të mund ta mundë Kurtin në zgjedhjet e ardhshme. E vetmja mënyrë është nëse Kurti do të marrë ndonjë prej këtyre partive në opozitës, pasi i vetëm e ka të pamundur të arrijë 50% i vetëm. E vetmja mënyrë është të krijojë koalicion me këto tre parti politike në opozitë. Së bashku me to më pas të shtyjë përpara çështjet e mbetur pezull. Si zgjedhjet në Veri dhe Asosacioni i komunave me shumicë serbe”, tha Sadiku.
Analisti gjithashtu konstatoi se kryekomunari i Leposaviqit, i dalë nga zgjedhjet e 23 prillit, Lulzim Ethemi po qëndron i ngujuar në ambientet e komunës prej 60 orësh, pasi bandat e serbëve e mbajnë të rrethuar godinën.
“Për shkaqe të sigurisë kryetari shqiptar i porsazgjedhur në Leposaviq është ngujuar në komunë dhe në një farë forme e ka të pamundur për shkak të rrethimit që i është bërë nga bandat kriminale të veriut. Ka pasur tallje gjatë gjithë ditës ndaj tij duke marrë kafshë dhe shkruar emrin e tij dhe nxjerrë nëpër qytet. Kjo që ka thënë zyrtari serb ose ish-kryetari i komunës se mund të dali lirisht nga zyra, është e pasaktë pasi bandat serbe atje do të mobilizoheshinh për të sulmuar me të gjithë metodat e mundshme”, nënvizoi ai.
/a.r
