Kroacia është çerekfinalistja e dytë e këtij Botërorit pas Rusisë, pasi ka mposhtur nga lotaria e 11-metërshave Danimarkën.

Koha e rregullt përfundoi 1-1 në barazim, ndërsa në kohën shtesë kroatët kishin mundësi të shënonin me anë të Modriç, por mesfushori i Realit humbi një 11-metërsh përballë portierit Shmajkel në minutën e 114-të të shtesës, me këtë të fundit që bëri mrekullinë.

Edhe gjatë goditjes së penalltive kanë qenë portierët protagonistë, ku Shmajkel priti dy 11-metërsha, ndërsa ai i Kroacisë, Subasiç u shndërrua në hero duke pritur tre të tilla.

Golin vendimtar nga pika e bardhë për skuadrën e Daliç e shënoi Ivan Rakitiç, i cili i dhuroi kalimin për në fazën çerekfinale kombëtares së tij.

Kësisoj, Kroacia do të ndeshet në sfidën e radhës në 7 korrik kundër Rusisë, e cila gjithashtu eliminoi me 11-metërsha pas kohës së rregullt dhe shtesë, Spanjën e Iniestës dhe Ramosit.