Kriza politike/ Zyrtari i DASH nuk takon Ilir Metën

Kriza politike në Shqipëri ka sjellë në Tiranë Drejtorin e Ri për Evropën Qëndrore dhe Jugore në Departamentin e Shtetit, i cili gjatë vizitës njëditore në Tiranë zhvilloi disa takime me liderët e opozitës, kryeparlamentarin Ruçi, Sekretarin e Përgjithshhëm të Partisë Socialiste dhe në fund kryeministrin Rama.

Jashtë axhendës mbeti Presidenti Ilir Meta, që mesa duket Shtetet e Bashkuara të Amerikës kanë pak besim se me ndërhyrjen e tij zgjidhet kriza politike që ka zënë fill që në shkurtin e këtij viti me djegien e mandateve e vijon ende.

David Kostelancik nuk erdhi në Shqipëri si një negociator për krizën, por për të mbledhur fakte dhe mbi të gjitha për të përcjellë një mesazh të Shteteve të Bashkuara të Amerikës për Shqipërinë.

Një ditë më parë, kur edhe u publikua në disa media axhenda e të dërguarit në Shqipëri të Departamentit Amerikan të Shtetit u tha se ishte planifikuar një takim pas Ramës edhe me kreun e shtetit, Ilir Meta, gjë që nuk ndodhi dhe vetë presidenca nuk ka dhënë asnjë sqarim për këtë.

Nuk dihet se për çfarë qëllimi, Kostelancik nuk e takoi Presidentin Meta, por zgjidhja e krizës nga zyra presidenciale duket se nuk ka më “bekim amerikan”.

Në të gjitha takimet, zyrtari i lartë i Departamentit Amerikan të Shtetit ka qenë i shoqëruar nga e ngarkuara më punë e ambasadës së SHBA në Tiranë, Leyla Moses-Ones. Sipas disa burimeve, ka qenë pikërisht diplomatja amerikane në Tiranë që ka përpiluar axhendën e Kostenlancik.

Por a është mjaftuar Kostelancik me faktet që i janë bërë publike nga maxhoranca dhe opozita?! Kjo pritet të shihet gjatë ditëve në vazhdim, me sjelljen politike të të dy palëve, Ramës dhë të tijve dhe nga krahu tjetër të Bashës dhe Kryemadhit.

Në fund të takimeve, tre kanë qenë mesazhet e forta të zyrtarit të lartë të Shteteve të Bashkuara të Amerikës; e para Qeveria t’i shtrijë dorën opozitës për zgjidhjen e krizës, e dyta Reforma Zgjedhore sa më parë të jetë e mundur dhe Reforma në Drejtësi, zbatimi për të cilën nuk duhet të hasë asnjë pengesë nga asnjë forcë politike. /l.m