Një vrasje për gjakmarrje ndodhi në burgun e Larisas më 29 mars të vitit 2015.
Një 42-vjeçar u hakmor për një vrasje të ndodhur 20 vite më parë në Shqipëri.
Ai goditi me thikë për vdekje një bashkatdhetar 47-vjeçar për shkak se një pjesëtar i familjes i kishte vrarë dajën e tij në Shqipëri.
Sipas informacioneve të gazetës “Eleftheria”, 42-vjeçari pasi vrau 47-vjeçarin, më pas ka plagosur rëndë një tjetër shqiptar.
Gjykata e Apelit e Larisas ka pezulluar gjykimin e shqiptarit i cili ishte akuzuar për vrasje me paramendim, lëndim të rrezikshëm trupor, përdorim arme dhe armëmbajtje në burg.
Si ndodhi vrasja në burg?
42-vjeçari, ndërsa më parë kishte “vizituar të burgosurin në qeli për kafe dhe për të mbledhur informacion për viktimën e tij të mundshme”, më pas zgjodhi pikën e “përshtatshme, të verbër nga kamerat e Burgut” ku me dy thika metalike, të improvizuara ka sulmuar me mizori të madhe 47-vjeçarin, duke e goditur me thikë në zemër.
47-vjeçari humbi ndjenjat nga goditjet e forta dhe ra në shkallët e gjera ndërmjet katit përdhes dhe katit të parë. 42-vjeçari dhjetë minuta më vonë me të njëjtat thika ka sulmuar një tjetër bashkatdhetar të tij, një 46-vjeçar, teksa ndodhej në korridorin e qelive të paraburgimit të krahut C.
Ambulancat i transportuan dy shqiptarët në Spitalin Universitar të Larisës, por tashmë ishte vonë për 47-vjeçarin, ndryshe nga tjetri i cili u shpëtua pas operacionit.
Agresori u arrestua dhe ndaj tij u ngritën akuzat e vrasjes me paramendim, por Apeli e shpalli të pafajshëm.
