Kryetari i Asamblesë Kombëtare të Sllovenisë, Milan Brglez, që ndodhet në Tiranë për një vizitë zyrtare i është drejtuar të enjten me një fjalë përshëndetëse Kuvendit të Shqipërisë.
Kryeparlamentari Brglez në fillim të fjalës së tij tha se kjo vizitë provon natyrën tradicionalisht miqësore dhe të frytshme të marrëdhënieve mes dy vendeve. Ai tha se Memorandumi i Mirëkuptimit, i nënshkruar sot prej tij dhe kryeparlamentarit Ilir Meta dëshmon angazhimin tonë të vendosur për bashkëpunimin mes dy parlamenteve.
“Dua të shpreh kënaqësinë time që me homologun meta nënshkruam një memorandum bashkëpunimi mes dy institucioneve, Ky angazhim është i dobishëm jo vetëm në nivelin praktik, sa i takon proceseve integruese, por edhe në nivel simbolik për zhvillimin e marrëdhënieve tona ndërparlamentare. Kriza e emigracionit i ka vendosur qindra mijëra persona në kufijtë tanë, e në vendet tona. Muajt e fundit na kanë dhënë një mësim të mirë, se Europa dhe BE janë diçka për të cilën ne duhet të punojmë shumë fort. Duhet të bashkëpunojmë në nivel rajonal e më gjerë.
Të gjitha proceset europianizuese nisin në parlamentet, qeveritë e shoqëritë tona. Shqipëria ka bërë hapa përpara në rrugën e integrimit europian. Mbështetja e procesit të dekriminalizimit është me shumë rëndësi, dhe një hap domethënës”, u shpreh Brglez.
