Nga Elton Metaj
Shefi i shërbimit të jashtëm inteligjent të Izraelit bëri një shfaqje të rrallë për median dhe publikun, duke uruar operativët e “Mossad”-it për suksesin e operacioneve ndaj Iranit.
Vetëm 48 orë pas nisjes së armëpushimit të mundimshëm Izrael-Iran, David Barnea, njeriu në komandën e informacionit dhe operacioneve speciale izraelite, vlerësoi edhe bashkëpunimin me Agjencinë Qendrore të Inteligjencës së SHBA-së, duke premtuar vigjilencë dhe vëzhgim të afërt të të gjithë projekteve të Teheranit.
Në harkun kohor të më pak se dy javëve, ekspozimi i vullnetshëm i “Mossad”-it karshi medias dhe publikut shënoi rastin e dytë, pas publikimit të videove se si operativët vepronin me baza në brendësi të Iranit dhe godisnin me sukses, krahas instalimeve të programit bërthamor e baterive kundërajrore, edhe krerët e ushtrisë e Gardës Revolucionare, përshirë ekzekutimin e shkencëtarëve që punonin për pasurimin e uraniumit të ajatollahut.
Ndërsa për 12 ditë Izraeli dhe Irani zhvilluan një luftë të ashpër ajrore dhe jo vetëm, fituesi i saj i vërtetë duket se është “Mossad”-i dhe shefi i tij. Me një vizion modern për agjencinë e inteligjencës, 60-vjeçari Barnea “pikturohet” nga media izraelite si njeriu që i fitoi, si betejat e brendshme në Institutin konservator për Inteligjencë dhe Operacione Speciale, ashtu edhe përplasjet me krerët e ushtrisë, prej vitesh kundërshtarë të ndërhyrjes në Iran.
Por çfarë e ndryshoi marshin e përplasjes prej dekadash mes Izraelit dhe Iranit, duke e bindur edhe Benjamin Netanjahun e Donald J. Trumpin të ndiznin makinerinë e luftës? Pse “Mossad” ishte tashmë një garanci për sukses dhe për turpërimin e regjimit të ajatollahëve dhe Gardës së tyre Revolucionare?
Çelësi i suksesit duket se togëzohet te David Barnea dhe njerëzit e tij, të cilët prej 2021-shit morën komandën e “Mossad”, duke e ndryshuar atë radikalisht. Kreu i “007”-ave izraelite, siç raporton media, u fokusua në “revolucionin biometrik”, duke e orientuar agjencinë drejt përdorimit të teknologjive më të avancuara.
Kamerat e zgjuara për mbikqyrje dhe njohjen e fytyrës, mes shumë ndryshimeve të tjera, u ndërthurën me qasjen e hapur të 60-vjeçarit nga Ashkeloni dhe të shkolluar në SHBA.
Testet e situatës së re të krijuar edhe pas 7 tetorit 2023 u kryhen me operacionin spektakolar të shpërthimit të “beeper”-ave që përdoreshin nga njerëzit e “Hezbollahu”-t, krahas goditjeve kirurgjikale për të ekzekutuar liderët e tyre dhe të “Hamas” në Bejrut, Teheran e Gaza.
Avancimi dhe diferenca e madhe teknologjike me kundërshtarin shtroi rrugën për të siguruar inteligjencë të dorës së parë mbi programin bërthamor të Iranit, përpara së cilës edhe Shtëpia e Bardhë do të detyrohej të ngrinte në aksion B-2 e frikshëm dhe bombën e tyre monstruoze antibunker.
“Luani në ngritje”, që e izoloi për ditë të tëra në bunker Liderin Suprem, nxorri në dritë edhe një supremaci, ndoshta të ditur, por të pashpallur të shërbimit inteligjent izraelit në rajon dhe jo vetëm. Teksa vetë “Mossad” po kërkon t’i tregojë botës për punët e tij, që dikur flisnin vetë, David Barnea duket se shijon suksesin dhe projekton planin e ardhshēm, që për median e Tel-Avivit, do të jetë kolltuku i nxehtë që mban sot Netanjahu. Sigurisht, pasi të ketë kaluar “ngrirjen” trevjeçare të detyrueshme pas lënies së “Mossad” në vitin 2026.
