Nga të dhënat zyrtare duket se qytetarët po tregohen gjithnjë e më korrekt me pagesat e kredive. Në 18 vitet e fundit, kreditë e këqija kanë kapur shifrën më të ulët duke shkuar në nivelin 3.77 % në fund të muaj maj të vitit 2026.
“Aktualisht niveli i kredive të këqija është 3.8%, nuk ka ndryshuar shumë nga fillimi i vitit, pra nga fundi i vitit 2025. Ndërkohë, në një horizont më afatgjatë krahasimi, aktualisht kreditë me probleme janë në nivelin më të ulët afërsisht që prej vitit 2008”, tha eksperti bankar Ersuin Shehu.
Sipas ekspertit Ersuin Shehu, disa nga faktorët që kanë ndikuar në uljen e kredive me probleme janë rritja ekonomike dhe masat e ndërmarra nga Banka e Shqipërisë.
“Pas krizës që origjinoi në vitin 2008 deri në vitin 2015, ndodhi një sërë procesesh brenda sektorit bankar. U bë fshirja e kredive të humbura, pati ndryshime strukturore, shitblerje dhe bashkime mes bankash. Ulja e raportit të kredive me probleme është shkaktuar sidomos nga ecuria e mirë e ekonomisë reale, bumi i sektorit të turizmit dhe pasurive të paluajtshme, por pjesërisht edhe rritja e shpejtë e kredisë së re”, tha ai.
Megjithatë, Shehu vlerëson se, pavarësisht nivelit të ulët të kredive me probleme, bankat duhet të vijojnë të zbatojnë politika të kujdesshme kreditimi, veçanërisht në një periudhë kur kreditimi po rritet me ritme të shpejta.
