Komisioni Qendror i Zgjedhjeve ka rrëzuar në mbledhjen e radhës disa denoncime të ardhura nga Partia Demokratike dhe Komiteti Shqiptar i Helsinkit lidhur me vendimet e disa bashkive të vendit sa i përket akteve që kanë ndërmarrë, që sipas denoncuesve ishin në shkelje të ligjit zgjedhor.
Komisioneri Ilirjan Celibashi theksoi se këto vendime kanë qenë të parashikuara në buxhetet bashkiake të miratuara më shumë se katër muaj para zgjedhjeve të 11 majit.
“Denoncimi nr. 52 prej Komitetit Shqiptar të Helsinkit ndaj kryetares së Bashkisë Durrës. pretendimet kanë qenë në lidhje me një njoftim të shpallur nga Bashkia Durrës për hapjen e aplikimeve për projekte për promovimin e artit, kulturës dhe sportit, si dhe një qendër kulturore artistike-sportive. Edhe ky projekt rezulton që është i mbështetur me fonde të cilat janë të përfshira në ligjin për buxhetin e shtetit të miratuar katër muaj përpara datës së zgjedhjeve,” tha z. Celibashi.
Gjithashtu në këtë mbledhje u diskutuan edhe urdhrat për heqjen e materialeve propagandistike nga zyrat zgjedhore të disa subjekteve politike.
