Kolegji i Posaçëm të Apelimit, KPA vendosi të hënën më 21 korrik lënien në fuqi të shkarkimit nga detyra të prokurorit të Durrësit, Saimir Bahiti. Vendimi u mor në mënyrë unanime nga trupi gjykues i Kolegjit i kryesuar nga Rezarta Schuetz, me relator Sokol Çomo dhe anëtare Albana Shtylla, Ina Rama e Natasha Mulaj, pas shqyrtimit në dhomë këshillimi të ankimit të Bahitit ndaj vendimmarrjes së Komisionit.
Prokurori i Durrësit, Saimir Bahiti u shkarkua nga detyra më 13 janar 2023 prej Komisionit të Pavarur të Kualifikimit pasi në vlerësimin tërësor të çështjes u konkludua se me veprimet dhe mosveprimet e tij, kishte cënuar besimin e publikut tek drejtësia.
Saimir Bahiti përfundoi studimet në Shkollën e Magjistraturës në vitin 2008 dhe e kreu stazhin profesional në Prokurorinë e Kurbinit. Ai e ushtroi funksionin në Prokurorinë e Shkodrës prej nëntorit të vitit 2008, deri kur u transferua përkohësisht në Gjirokastër. Në vitin 2021 ai u emërua prokuror në Prokurorinë e Rrethit Gjyqësor Durrës, ku e ushtroi funksionin deri në momentin e shkarkimit nga detyra.
