Paraqitja e përfaqësueses së Kosovës në xhudo, në kampionatin evropian për seniorë që do zhvillohet nga 12 deri më 24 prill në Kazan të Rusisë, nuk vihet në dyshim, shkruan “Koha Ditore”. Por, në dyshim është se me çfarë simbolesh do të paraqitet përfaqësuesja e sportit më të suksesshëm në Kosovë.
Gjasat janë të vogla që xhudistët kosovarë të paraqiten me flamurin e Kosovës në Rusi. Rusia nuk e ka njohur shtetësinë e Kosovës dhe në vazhdimësi u ka nxjerrë telashe sportistëve kosovarë në garat që janë organizuar në këtë vend.
Ditë më parë xhudistët morën pjesë në turneun “Grand Prix” që u mbajt në Gjeorgji, por vetëm me flamur të Federatës Ndërkombëtare të Xhudos (IJF). Probleme për të garuar me flamur të Kosovës në garat ndërkombëtare në shtetet që nuk e kanë njohur shtetësinë Kosovës, kanë pasur edhe sportistë të sporteve tjera.
E për këto shqetësime, zyrtarë të lartë të sportit kanë marrë garanci nga nënkryetari i Komitetit Olimpik Evropian (EOC), Janez Kocijançiç, se nuk do të ndodhin. Zyrtarët kosovarë kanë takuar Kocijançiçin gjatë një vizite në Lubjanë.
“Në takimin që patëm me nënkryetarin e Komitetit Olimpik Evropian ka qenë një prej temave edhe çështja e flamurit dhe himnit të Kosovës që në disa vende që nuk e kanë njohur Kosovën, nuk po e lejojnë. Kemi kërkuar që të mos ndalohet.
Ne morëm premtime dhe zotime nga zotëri Kocijançiq që Kosova do të trajtohet njëjtë si të gjitha shtetet pjesëmarrëse në garat e ardhshme. Na premtoi se telashe të tilla nuk do të ndodhin më”, ka thënë Ibër Alaj, drejtor i Departamentit të Sportit pranë Ministrisë së Kulturës, Rinisë dhe Sportit…
