Kreu i Bashkisë së Tiranës dhe njëherësh edhe kreu i PD Lulzim Basha këtë radhë i ka lënë rrethet, dhe ka shoqëruar në takimin e radhës elektoral kandidatin e tij për kryeqytetin Halim Kosova.
Por Kosova është munduar “ta bëjë për ujë të ftohtë” kreun e tij, duke thënë me humor gjatë takimit me të rinjtë se Basha do të japë llogari për ato që nuk ka bërë në katër vite në krye të Bashkisë së Tiranës.
“Jemi këtu me Bashën që ai do japë llogari ça s’ka bo dhe unë çfarë do rregulloj”, tha Kosova.
Doktor Kosova tha gjithashtu se sipas tij qytetarët e Tiranës, nuk vuajnë nga mungesa e punimeve dhe investimeve në Tiranë, por po vuajnë mjerimin dhe varfërinë.
Dhe pikërisht për këtë fakt kandidati i djathtë tha se nuk bëhej pjesë e batutave që ka përfshirë këtë fushatë paraelektorale, dhe kjo jo se i mungon humori por se sheh mjerim dhe varfëri në kryeqytet.
“Jo vetëm që duhet me pa larg po edhe afër, se duke parë larg harrojmë nevojat qe atyre që kemi afër. T’i themi mjaft mjaftit, besim për të ardhmen. Fjala mjaft s’duhet të ekzistojë… ..Kam shumë kritika pse s’bëhem pre e debateve, batutave, humorit, i cili s’më mungon. Por çdo ditë që shkel Tiranën, shoh që mjerimi është aty ku s’mban më, s’më vjen të bëj humor ndërkohë që shumica e banorëve të këtij qyteti vuajnë peshën e varfërisë”, vijoi Kosova.
Ndërsa Lulzim Basha, i cili për të parën herë ishte i pranishëm në takimet e Halim Kosovës, preferoi që t’i shoqërojë këto me batuta.
