Një ngjarje tragjike ka tronditur komunitetin në Kerzers, kantoni Fribourg në Zvicër, kur një autobus i shërbimit publik u përfshi nga flakët, duke lënë të paktën 6 të vdekur dhe 5 të plagosur, sipas autoriteteve zvicerane dhe raportimeve lokale.
Një shqiptar 32-vjeçar, Faton Morina, ka rrëfyer tmerrin që përjetoi gjatë ngjarjes së autobusit të djegur në Kerzers, kantoni Fribourg, ku 6 persona humbën jetën dhe 5 u plagosën, disa me gjendje kritike.
Morina, që aktualisht po trajtohet për djegie në gjymtyrë dhe trup në spitalin Inselspital në Bernë, ka treguar se ishte në autobus kur një burrë derdhi benzinë mbi vete dhe i vuri flakën, duke shkaktuar tragjedinë.
“E pashë me sytë e mi. Ai mori benzinë, pastaj i vuri flakën vetes. Paniku ishte i madh, njerëzit u përplasën dhe disa nuk mundën të shpëtonin”, citoi Morinën kushëriri i tij Arbi Berisha për mediat zvicerane.
Sipas dëshmive të para dhe videosh të shpërndara në rrjetet sociale, një burrë i moshuar që mbërriti në autobus me çanta me lëndë të ndezshme u pa duke derdhur benzinë mbi vete dhe duke u ndezur brenda mjetit.
Ngjarja ndodhi të martën pasdite, rreth orës 18:30, kur autobusi po udhëtonte drejt Kerzers-it në orët e pikut të pasagjerëve. Flakët përfshinë shpejt mjetin e mbushur me njerëz, duke bërë që disa të bënin përpjekje për t’u larguar, ndërsa të tjerë mbetën të bllokuar.
Sipas të afërmit të Morinës, dalja nga autobusi u bllokua, dhe djegiet ndodhën ndërkohë që ai përpiqej të hapte dyert për t’u shpëtuar.
Shumë nga të lënduarit, përfshirë Morinën, u transportuan në spitalet rajonale. Ai ka pësuar djegie kryesisht në duar, këmbë dhe fytyrë, dhe aktualisht trajtohet i traumatizuar në spitalin Inselspital në Bernë. Një prej të plagosurve është dërguar në një spital në Zürich me helikopter.
Zyrtarët policorë kanë nisur një hetim penal për zjarrvënie, vrasje dhe rrezikim të jetës së të tjerëve, por deri tani nuk ka prova zyrtare që ngjarja të jetë një akt terrorizmi. Autoritetet po analizojnë pamjet nga kamerat dhe dëshmitë e mbledhura për të përcaktuar shkaqet dhe motivet e incidentit, përfshirë edhe hetimin e arsyes pse dera e autobusit nuk u hap menjëherë dhe pse pasagjerët u bllokuan brenda
Ngjarja ndodh vetëm pak muaj pas një zjarri tragjik në Crans-Montana, ku 41 persona humbën jetën në një incident tjetër të dëmshëm në Zvicër, duke zemëruar dhe tronditur publikun dhe politikën zvicerane.
