Akuza në ngarkim të zëvendësdrejtorit të Përgjithshëm të Burgjeve, Iljaz Labi, dhe katër biznesmenëve, të akuzuar për “korrupsion”, tashmë është plotësuar me thëniet e një “të penduari”.
Zyrtari i lartë i Burgjeve dyshohet se mbante kontakte me administratorët e 4 kompanive që merrnin pjesë në tenderat e Drejtorisë së Burgjeve për furnizimin me ushqime, duke paracaktuar fituesin kundrejt ryshfetit.
Përveç përgjimeve dhe provave të tjera shkresore, organi i akuzës ka siguruar edhe bashkëpunimin e një prej biznesmenëve të akuzuar për përfshirje në afera korruptive.
“I penduari” i kësaj dosjeje mësohet të jetë biznesmeni Ylber Kalaja, administrator i shoqërisë “Vllaznia”. I dyshuari Kalaja mësohet se ka pranuar të japë deklarime para prokurorëve, duke zbardhur momente dhe të dhëna të tjera të vlefshme për hetimin e nisur nga Krimet e Rënda.
Bashkëpunimi i tij është marrë në konsideratë nga Prokuroria, e cila kërkoi dje zbutjen e masës “arrest në burg” ndaj tij. Pesë të arrestuarit e operacionit policor “Melas” u paraqitën dje te Krimet e Rënda për verifikimin e masës së sigurisë “arrest në burg” dhënë në mungesë ndaj tyre.
HETIMI
Në përfundim gati 9 muajsh hetim, ku u përdorën edhe metodat speciale të përgjimit dhe vëzhgimit, Prokuroria për Krimet e Rënda ngriti dyshime të bazuara në prova se administratorët e kompanive kanë bashkëpunuar me njëri-tjetrin, me qëllim marrjen në mënyre fiktive të prokurimit me objekt “Blerje bulmet dhe veze”, tender me vlerë 22.6 milionë lekë.
“Për realizimin e qëllimit, të katër personat e dyshuar kanë biseduar për të paguar në mënyrë solidare të paktën një shumë prej 2 milionë lekësh të rinj te zëvendësdrejtori i Përgjithshëm i Burgjeve, Iljaz Labi, me qëllim që ky i fundit t’u krijonte lehtësitë e nevojshme gjatë procedurës së prokurimit”, thuhet në dosjen e Prokurorisë. (panorama / r.a)
