Punimet për zgjerimin e aksit Elbasan-Qafë Thanë, si pjesë e Korridorit VIII po vijojnë me ritme të shpejta. Lajmin e ka ndarë me ndjekësit mëngjesin e sotëm kryeministri Edi Rama në Facebook.
“Mirëmëngjes dhe nga kantieri i rrugës Elbasan-Qafë Thanë, Korridori VIII që po merr formë, e ku punimet për zgjerimin e saj vijojnë me ritme të shpejta, ju uroj një ditë të mbarë”, shkruan Rama në Facebook, krahas pamjeve nga punimet.
Për ndërtimin e aksit Elbasan-Qafë Thanë, pjesë e Korridorit VIII, po punohet paralelisht në disa lote. Krahas ndërtimit të trupit të rrugës punohet edhe për ngritjen e veprave të artit, ku përgjatë këtij aksi parashikohen disa vepra të rëndësishme. Pjesë e projekti, për këtë vepër e cila lidh Shqipërinë me Maqedoninë e Veriut, por njëkohësisht shkurton distancës edhe mes kryeqytetit dhe zonës juglindore, është edhe mbrojtja lumore.
Më 27 janar të këtij viti nisën gjithashtu punimet edhe në aksin Elbasan-Rrogozhinë, pjesë e Korridorit VIII. Ministrja Balluku njoftoi pak ditë më parë se puna ka nisur me 18 kilometrat e parë, Elbasan-Papër-Ura e Grykshit, dhe brenda pak javëve është avancuar ndjeshëm.
Segmenti shtrihet përgjatë luginës së lumit Shkumbin dhe pothuajse i gjithë aksi do të jetë në një gjurmë të re, duke mos krijuar kështu asnjë problematikë në lëvizjen e automjeteve gjithë kohës kur do të kryhen punimet. Gjithashtu, ky aks do të lidhet edhe me autostradat e tjera që po ndërtohen, Kashar-Lekaj apo bypass-in e Elbasanit.
