Monika Kryemadhi do të jetë kryetarja e Lëvizjes Socialiste për Integrim. Propozimi i Petrit Vasilit është votuar nga delegatët e LSI. Në një votim të hapur, Kryemadhi mori votëbesimin për të qenë në krye të kësaj force.
Po ashtu, me një votim të përbashkët u zgjodh edhe zv.kryetari i ri Luan Rama dhe nënkryetarja Erisa Xhixho.
Drejtimi i ri i Lëvizjes Socialiste për Integrim:
Kryetare e LSI- Monika Kryemadhi
Zvkryetar i LSI- Luan Rama
Nënkryetare e LSI- Erisa Xhixho
Kryetar i Grupit Parlamentar- Petrit Vasili
Zgjedhje e drejtuesve të rinj në LSI u bë me votim të hapur përmes kartonëve:
***
Lëvizja Socialiste për Integrim ka çelur Konventën e saj Kombëtare ku pritet të zgjedhë në postin e kreut të kësaj force deputeten Monika Kryemadhi. Po ashtu, në Konventë do zgjidhen edhe Zv.kryetari i ri, post në të cilin do jetë Luan Rama si dhe nënkryetarin ku do zgjidhet Erisa Xhixho. Pas fjalës hapëse, kryetari në detyrë Petrit Vasili, në fjalimin e tij ka sulmuar ashpër kryeminsitrin Rama. Ai tha se zgjedhjet u manipuluan njësoj si në vitin 1996.
“Është fare e qartë se marrëveshja e 17 majit mes dy bashkëideatorëve ishte marrëveshje kundër LSI. Marrëveshja e 17 majit ia mbylli gojën opozitës. Ne pamë se si OSBE dhe ambasada amerikane ishin më të shqetësuara se kjo opozitë, për zëvendësimin e votës së lirë me votën e blerë. Këto zgjedhje ishin një ripërsëritje të zgjedhjeve të zeza të 1996-ës, që ishin parathënia e tragjedisë së ’97-ës”, deklaroi Vasili.
Ai paralajmëroi për një betejë të ashpër të LSI-së në opozitë ndaj qeverisë Rama. Vasili tha se LSI do jetë barrikadë në çdo fshat e qytet.
“Misioni ynë historik është sot se më shumë se 80 % e shqiptarëve që nuk pranojnë të qeverisen nga kjo pakicë, të bëhemi barrikadë në çdo fshat e qytet. Kjo qeveri dhe ky kryeministër, e përdori BE për të bërë sondazhe të paguara. Kësaj qeverie, këtij kryeministri nuk i duhet BE për të respektuar punonjësit e shërbimit civil, pasi po zbaton nenin që përdori Berisha për largimin e mijëra punonjësve. Kjo qeveri nuk i referohet BE-së për oligarkinë që shkarkoi dhjetëra miliona euro për të blerë votat që tronditi edhe euron”, tha Vasili.
