Këngëtarja me famë botërore, Dua Lipa ka folur sot shqip në një konferencë për media para nisjes së “Sunny Hill Festival”.
Ajo ka treguar se ndihet shumë e lumtur që ndodhet në Prishtinë dhe mezi po pret që të performojë këngët e saj
“Do të jetë befasi, është diçka shumë special që është krijuar vetëm për këtë performancë, është një ndjesi shumë e mirë që të performoj në Prishtinë, nuk ka ndjenjë më të mirë, energjinë që ma jep, mezi pres me i ndje ato emocione para se të dalë në skenë”, ka thënë Dua.
Më tej, Dua shtoi se tashmë vëmendja e saj më e madhe është vetëm te performanca si dhe shpreson që të gjithë të kënaqen.
“Dua vetëm të falënderoj të gjithë për ndihmën, energjinë dhe dashurinë që na jepni në këto ditë dhe mbështetjen për fondacionin që e kam shumë për zemër, ndjehem krenare që jam këtu, vëmendjen e kam patur vetëm të performanca, shpresoj që do të iu pëlqej e të kënaqemi, po ndihem shumë mirë që jam në shtëpinë time, në vendin tim”, përfundoi këngëtarja me famë botërore.
Nga ana tjetër, Komuna e Prishtinës ka ndarë 150 mijë euro për organizimin e “Sunny Hill Festival”.
Telegrafi ka zbardhur dhe publikuar dokumentin.
Dua është shfaqur shumë e buzëqeshur sot para kamerave dhe tha se ndihet shumë e lumtur dhe krenare që mbërriti në vendin e saj.
/e.d
