Komisioni Hetimor për kontratat koncesionare në Shëndetësi ka mundur të zhvillojë vetëm dy mbledhje normale.
Për mazhorancën, tentativat e demokrates Albana Vokshit për ta thirrur Komisionin në mënyrë të njëanshme janë të paligjshme.
“Mbledhje konsiderohet prezenca e te gjithe anëtarëve të Komisionit ose minimalisht e shumicës se Komisionit për të bërë kuorumin e nevojshëm sipas ligjit. Ç’ka do thotë që këto tre shfaqjet mediatike nuk kanë qenë mbledhje. Kryetarja nëse do kryente detyrën e saj sipas ligjit duhet te garantonte koordinim mes gjithë anëtarëve te komisionit në mënyre që mbledhja te ishte e vlefshme”, u shpreh Ndreca.
“Siç duket opozita dhe kryetarja e Komisionit e ka privatizuar pozicionin e kryetares dhe e konsideron si pronë të saj këtë pozicion. Është kthyer në Prokurore publike, është kthyer në paragjykuese te qartë të procesit, ka deligjitimuar veten dhe përfaqësuesit e opozitës në këtë Komision. Unë nuk e kuptoj pse duhet te hetojmë kur ata e kanë nxjerr konkluzionin”, tha ai.
Por, kur do jetë mbledhja e radhës e Komisionit? Për socialistët ligji është i qartë. Ekspertet e Partisë Socialiste po punojnë për planin e hetimit dhe vetëm atëherë sipas Ndrecës, komisioni mund te jetë gati për tu mbledhur.
“Ekspertët do duan ndoshta edhe një javë që të mbyllin një plan hetimi që mund ti nënshtrohet vendimmarrjes ne Komision. Momentin që do kemi një plan hetimi, atëherë është ne kushtet për tu mbledhur Komisioni. Mund ta thërrasim dhe ne mbledhjen, por mund të koordinojmë dhe me kryetaren e Komisionit për të bëre një mbledhje të vlefshme”, u shpreh Ndreca.
Nënkryetari i komisionit garanton se mazhoranca do të ndjekë procedurën parlamentare te hetimit për një proces te rregullt ligjor.
“Pasi unë kam bëre disa deklarata u kujtua kryetarja e Komisionit të na sjellë nga ekspertët e saj edhe planin e saj hetimor që në fakt është copy-paste i planit hetimor paraprak që ka thënë në mbledhjen e parë, është copy-paste i pretencës 9 -vjeçare të opozitës. Ne jemi vendosur të bëjmë një proces te rregullt ligjor, sepse nëse ne kemi konkluzione dhe bindje se ne çfarë konkluzionesh do dalim atëherë ne kot e kemi ngritur komisionin”, tha ndër të tjera ai.
Socialistët janë të bindur se demokratët nuk duan një hetim objektiv por po bëjnë show mediatik me urdhër të shefave politik që i ndjekin nga ekrani./m.j
