Pas shqetësimit të ngritur nga Ora News mbi rradhët kilometrike në pikën e kolaudimit të automjeteve në kryeqytet, Ministri i Transportit, Edmond Haxhinasto, ka zhvilluar në orët e pasdites një inspektim të papritur në mjediset e pikës se kolaudimit të makinave në Prezë të Tiranës.
Ministri Haxhinasto tha se nga kompania SGS që ka konçesionarin e kolaudimit kërkohet performancë më e mirë.
Problemi i ngritur nga OraNews
Kolaudimi i makinave në këtë fundvit mbetet një shqetësim për qytetarët të cilët e shtynë këtë proces deri në ditën e fundit të vitit, duke vënë në vështirësi veten dhe autoritetet e kolaudimit për shkak të grumbullimit të fluksit në fund të dhjetorit.
“Ora News” solli pamjen që ishte sot ne pikën e kontrollit të automjeteve në Tiranë.
Mbi dy kilometra ishte vargu i makinave të cilat presin në radhë ndërkohë që drejtuesit e këtij shërbimi garantojnë shërbim me intensitet deri më 31 dhjetor duke përfshirë edhe ditët e pushimit.
Drejtuesit e automjeteve që presin me orë apo ditë të tëra për të kaluar “testin” e përvitshëm.
“Kam që në orën 5 të mëngjesit. Kam lënë makinën natën këtu dhe erdhëm tani në 5 të mëngjesit”, thotë një qytetar.
“U bë katër orë që pres. Kam ardhur që në mëngjes, në orën 6. Kjo është dita e dytë që vij. Këtë vit është më keq se vitin e shkuar”, thotë një tjetër qytetar.
“Kam ardhur që në katër të mëngjesit”, shprehet qytetari tjetër, ndërsa shton se nëse nuk mbaron punë “do të vi që në 12 të natës për ta gdhirë këtu”.
“Ora News” ka kontaktuar me drejtuesit e kolaudimit të cilët shprehen se puna në këtë pikë nuk është ndalur për asnjë moment, duke nisur që nga orët e para të mëngjesit e deri në orët e vona të mbrëmjes.
Sipas drejtuesve puna do të vijojë me intensitet edhe ditën e dielë për të vijuar deri në ditën e fundit të vitit 2015.
Megjithatë qytetarët shprehen të shqetësuar pasi po detyrohen të presin me orë të tëra për të kryer aktin e kontrollit teknik. Fluksi është shtuar ndjeshëm këto ditë edhe për arsyen e thjeshtë se të gjithë e lënë për ditët e fundit kryerjen e kolaudimit të automjeteve dukë shkaktuar kaos.
Qytetarët janë të detyruar të përfundojnë kolaudimin e makinës deri në fund të vitit në të kundërt në janar të 2016-ës ata do të paguajnë kolaudimin edhe taksat e makinës për dy vite.
/Oranews.tv/