Duket se qënia në një koalicion qeveritarë si në nivel qendror ashtu edhe lokal mes PS dhe LSI, nuk ka arritur të shërojë “plagët e vjetra” të përplasjeve herë me natyrë politike e herë personale mes kryetarit aktual të Bashkisë së Durrësit, Vangjush Dako dhe ministrit të Mjedisit, Lefter Koka. Përplasjet mes dy prej këtyre figurave qëndrore të qytetit të Durrësit janë mjaft të njohura, që nga koha kur Rama nuk vendosi të mbështesë më Kokën për një mandate të dytë në krye të bashkisë së Durrësit, por zgjodhi në vend të tij, Dakon. Përplasjet mes Dakos dhe Kokës vijuan edhe gjatë zgjedhjeve vendore të vitit 2011 ku Koka mbështeti kandidatin e PD-së, Ferdinand Xhaferri, kundër, Vangjush Dakos. Por edhe më pas fërkimet dhe tensionet mes Dakos dhe Kokës kanë vijuar edhe gjatë zgjedhjeve vendore të 2015, ku ndonëse PS dhe LSI ishin në koalicion, sërish Dako nuk pati mbështetje të dukshme nga LSI në këto zgjedhje. Për të mos harruar se në jo pak raste Dako gjatë 10 viteve të punës së tij në krye të bashkisë së Durrësit ka akuzuar në jo pak raste këshilltarët e LSI-së se kanë sabotuar jo projekte të Bashkisë gjatë procesit të vendimarrjes në këshillin bashkiak.
Si për të hapur sërish “plagët e vjetra”, Koka nuk ka ngurruar sot në 12 vjetorin e LSI të sulmojë kryebashkiakun Dako, duke e akuzuar këtë të fundit për mungesë bashkëpunimi sa i përket problematiëkës së mbetjeve urbane. Sipas ministrit të Mjedisit, Lefter Koka nuk ekziston asnjë bashkëpunim mes tij dhe kryebashkiakut të Durrësit, Vangjush Dako dhe kjo është arsyeja që çështja e mbetjeve urbane nuk po gjen zgjidhje në Durrës, ndryshe me bashki të tjera, që siç pohoi ai, kanë gjetur gjuhën e komunikimit me ministrinë që ai drejton. I pyetur nga gazetarët për problemin e mbetjeve në Durrës, Ministri Koka u përgjigj se problemi qëndron me Bashkinë e Durrësit: “61 Bashkitë e vendit duhet të prezantojnë projekte pranë qeverisë qendrore. Fatkeqësisht me Bashkinë Durrës nuk ka ndodhur kjo. Bashkëpunimi nuk ekziston! Qytetarët durrsakë kanë nevojë për 1 klimë më optimiste, situata në këtë qytet nuk është ajo që dëshirojnë.” Ai shtoi më tej se, me bashkitë që kanë dashur bashkëpunimin, qeveria qendrore ka bërë punë shumë të mirë.
ma.me
