Deputeti i Partisë Demokratike, Oerd Bylykbashi, që ishte dhe një prej negociatorëve të takimit mes dy liderëve të PD dhe PS, Basha e Rama, ka treguar se sa mundësi ka të bëjnë koalicion pas-zgjedhor dy partitë e mëdha.
I ftuar në emisionin “Kjo Javë” të gazetares Nisida Tufa, në News24, Bylykbashi tha se fokusi i vetëm i Partisë Demokratike është të dalë forcë e parë dhe të realizojë programin që ka, shkruan BalkanWeb.
Koalicioni PD-PS? Sa i mundshëm?
Bylykbashi: Nuk bëj analistin dhe opinionistin. Fokusin e kam të fortë që PD synon pushtetin për të realizuar programin që ka. Ne luftojmë për pushtetin që të jetë efektiv. I përdorim të gjitha batëritë për këtë. Ne synojmë të jemi forca e parë që kërkon formimin e qeverisë. Populli është i mërzitur nga këto 4 vite qeverisjeje.
Nëse PD del forcë e parë po se formon dot qeverinë do bashkohej me LSI-në?
Bylykbashi: Shqipëria duhet të ndryshojë në mënyrë rrënjësore. Republika e Re nuk është term bosh, por është kuptimplotë. Se mënyra si janë qeverisur shqiptarët, politikanët shpesh janë bërë të papranueshëm, dhe nuk mund të vazhdohet në këtë formë. Politika duhet të kthehet tek njerëzit e thjeshtë. Objektivi ynë është të largojmë qeverisjen e keqe të prodhuar nga PS-LSI.
