I ftuar në një intervistë televizive, eksperti i Sigurisë komentoi sulmin me tritol në banesën e babait të kreut të Klanit Duka. Sipas tij grupet kriminale herë pas herë gjallërohen edhe në momentin kur mendohet se ato kanë ndalur.
Sipas tij, për aq kohë sa mbi këta persona me precedent kriminal nuk veprohet nga ana e drejtësisë, gjithmonë do të ketë forma të vetëgjyqësisë. Ai thekson se këta persona, kryesisht të rinj janë ose në burg ose në varreza.
“Herë pas herë të gjitha grupet kriminale gjallërohen. Ato që duken si konflikte të ndaluara ato gjallërohen. Ata kanë të njëjtën hakmarrje dhe në një moment te caktuar do veprojnë sërish. Këto hakmarrje apo forma të aktivitet që kryejnë nuk do ndalojnë, për aq kohë sa mbi ta nuk veprohet. Këta janë o në burg o në varreza. Shqipëria nuk ka besim te drejtësia, ndaj ata zgjedhin formën e vetëgjyqësisë”, tha Softa.
Sipas Softës, situata me grupet kriminale do të jetë edhe më e vështirë, për shkak se policia tashmë do të jetë e përqendruar në fushatën elektorale.
Ai thekson se krimi nuk mund të goditet me aksione, por duket punuar çdo ditë, madje duhet të goditen edhe ekonomitë e tyre, që financojnë aktivitetin kriminal.
“Situata do të jetë edhe më e vështirë, për shkak se ne po shkojmë edhe në fushatë elektorale. Policia do jetë e përqendruar tek kutitë e votimit, tek rendi dhe siguria dhe këto hapësira mund të shërbejnë. Grupet kriminale nuk punohet me aksione. Kërkon një punë të përditshme, kërkon një evidentim të veçantë. Nga personat problematik që kanë vuajtur dënimin dhe janë në liri, grupet që kanë aktivitete, lidhjet që kanë ata. Është edhe krimi ekonomik që e stimulon krimin. Për aq kohë sa Shqipëria është futur në zonën që ka probleme me pastrimin e parasë, me drogën, me hyrje dalje të armëve tregon që linja në Shqipëri është për futjen dhe daljen e këtyre armëve”, tha Softa.
