Emocione, dy gola, kartonë të kuq dhe barazim… Në Fushë Krujë, sfida mes Kastriotit dhe Laçit është ndarë në paqe. Vendosën golat e Roger dhe Fangaj, teksa rastet për shënim kanë qenë me pikatore në këtë përballje.
Arbitri është detyruar ta ndërpresë takimin disa herë për shkak të faullave të shumtë dhe ndërhyrjeve të ashpra, aq sa në fund të pjesës së parë u detyrua që të nxirrte edhe kartonin e kuq, në dëm të Çelës, që i ndërhyri ashpër Fangajt. Gjyqyari Xhaja nuk hezitoi dhe e nxorri jashtë lojtarin e kurbinasve.
Shumë kontestime në stadium dhe ofendime, teksa pjesa e parë u mbyll 0-0.
Në pjesën e dytë, bardhezinjtë patën më shumë volum dhe presion, teksa Naydenov shpërdoroi gjithçka, me portën e boshatisur. Maqedonasi nuk ishte ndoshta në ditën më të mirë, aq sa barazoi edhe kartonët e kuq në fushë, duke dalë edhe ai jashtë si Çela.
Në fund, takimi i ndez me golin e brazilianit Roger, që mposhti Selmanin, por miqtë u kundërpërgjigjën me Fangaj.
Barazimi çon në kuotën e 7 pikëve Laçin, teksa Kastrioti, pas katër humbjesh radhazi, ndal disi hemoragjinë, edhe pse rrezikon mbijetesën.
Pas ndeshjes, foli edhe për “Gol pas Goli”, Supersport, trajneri i Kastriotit, Plori: Për mënyrën si shkoi pjesa e parë jam i kënaqur, por fakti që shënuam dhe e pësuam në fund të sjell keqardhje. Këto dy pikë të flakura mund të na kushtojnë shumë. Nuk e prisja që të luanim më mirë me dhjetë lojtarë. Objektivi? E dimë që mbijetesa është tepër e vështirë, sepse dihet konkurrenca”.
KATEGORIA SUPERIORE – JAVA 5
E diel, më 23 shtator, ora 15:45
Stadiumi “Redi Maloku”, Fushë-Krujë
Kastrioti 1-1 Laçi
Shënues: Roxher 78’/ fangaj 89′
