Një shtetase greke është kapur në kufirin me Shqipërinë nga policia e shtetit të saj. Bëhet fjalë për një rast të veçantë, të raportuar nga ‘Protothema’ e cila shkruan se gruas iu gjetën 23 mijë euro në bagazhet e saj.
Grekja, identiteti i së cilës nuk bëhet i ditur, ka mbajtur në portofol një shumë prej 400 eurosh të cilat i ka deklaruar, ndërsa në valixhe kishte fshehur 23 mijë euro të tjera. E gjitha kjo jo vetëm për t’i shpëtuar kontrollit, por edhe për t’iu ruajtur ndonjë grabitje të mundshme në rrugët e Shqipërisë.
E pyetur përsë nuk donte të deklaronte një shumë të madhe parash, shtetësja greke mësohet të jetë shprehur se ato po i sillte në Shqipëri, pasi bankat greke nuk ishin më të sigurta për kursimet.
Policia, jo e bindur për deklaratat e gruas, ka nisur hetimet mbi ngjarjen e ndodhur në Kakavijë. Gruaja po udhëtonte drejt Tiranës, ndërsa veç gjobës ajo rrezikon edhe dënime më të rënda.
