Emri i tij u rikthye sërish në fokus nga ambasadori amerikan Donald Lu, i cili deklaroi dy ditë më parë se kriminelë si Emiljano Shullazi lëvizin të lirë.
I përmendur nga opozita si një prej personave të botës së krimit i lidhur me Ministrin e Brendshëm Saimir Tahiri, akuzat e opozitës do të arrinin kulmin në fillim të këtij viti, kur dhe deputetja demokrate Voltana Ademi e paditi atë për kërcënim.
Por, pas 10 muajsh hetime, Prokuroria nuk ka arritur të faktojë pretendimet e ish-deputetes Ademi, aktualisht kryetare e Bashkisë Shkodër.
Në padinë e Ademit në Polici, dhe në deklaratat publike të selisë blu, thuhej se Emiljano Shullazi i kishte dhënë një mesazh kërcënues Voltana Ademit për kreun e Partisë Demokratike Lulzim Basha.
Referuar dosjes kjo ngjarje ka ndodhur në një lokal në zonën e “21 Dhjetorit” në Tiranë, por organi i akuzës nuk ka siguruar prova për të vërtetuar ngjarjen. Në këtë situatë, prokuroria e Tiranës ka pezulluar dosjen deri në gjetjen e provave.
