Shumë dëshmi qarkullojë rreth mënyrave të rekrutimit të Shtetit Islamik, por ky rast me protagoniste një shqitare nga Kosova nuk është aspak i zakontë.
Bëhet fjalë për një vajzë të re vetëm 20-vjeçare e cila braktis bashkëshortin e saj, dhe largohet me të dashurin për tu martuar në Shtetin Islamik.
Norë Zuzaku, kishte lënë burrin, me të cilin ishte e martuar në Zvicër, për t’u kthyer në shtëpinë e prindërve të saj, në Vërbicë të Gjilanit, dhe për t’u bashkuar ndërkohë me Tahir Isufin përmes rrjeteve sociale. Isufi, i martuar dy herë, kishte lënë të dy gratë e tij në shtëpinë e tij në Mitrovicë, dhe kishte planifikuar martesën me Norën, në “Shtetin Islamik”.
Tahir Isufi 29-vjeç së bashku me të dashurën e tij Norën dhe me shokun e tij Ismajl Zenelin 21-vjeç, më 14 nëntor ishin nisur nga Kosova me qëllim që t’i bashkohen “Shtetit Islamik” në Siri. Jo përmes Aeroportit të Prishtinës, siç shumica e pjesëmarrësve në ISIS nga Kosova kanë shkuar. Ata kishin udhëtuar me autobus deri në Han të Elezit nga aty dhe kishin marrë një taksi për të shkuar deri në Aeroportin e Shkupit prej nga janë nisur për në Stamboll.
Këta të tre janë zbuluar nga autoritetet turke më të mbërritur në Stamboll, prej nga edhe janë kthyer. Me t’u kthyer në pikën kufitare të Hanit të Elezit, tre personat janë arrestuar nga Policia, nën dyshimin se kanë kryer veprën penale të “Bashkimit apo pjesëmarrjes në një formacion të jashtëm paraushtarak ose parapolicor”.
Të tre personat të martën janë paraqitur para gjykatësit të procedurës paraprake, ku edhe iu është caktuar masa e paraburgimit në kohëzgjatje prej një muaji.
