Ka nisur sot faza e dytë e konkurimit, testimi fizik, për Patrullë të Përgjithshme. 1 040 konkurrentët të cilët u kualifikuan nga faza e parë, testimi me shkrim, do t’i nënshtrohen këtij testimi fizik që vlen 20% të vlerësimit final.
Testimi fizik po zhvillohet në ambientet e reja të Repartit Special “RENEA”, në Yzberisht dhe procesi ka nisur që prej orës 07:30 të mëngjesit.
“Për 10 ditë rresht, nga 100 aplikantë çdo ditë, sipas rendit zbritës të pikëve dhe qarqeve përkatëse, të cilët janë njoftuar nga Drejtoritë Vendore të Policisë do të marrin pjesë në testimin fizik, proces i cili do monitorohet nga Drejtoria e Standardeve Profesionale në Policinë e Shtetit, Drejtoria e Burimeve Njerëzore dhe SHÇBA në Ministrinë e Brendshme”, njofton Ministri i Brendshëm, Sandër Lleshaj në një reagim të tij, ku publikon dhe video nga dita e parë e testimeve fizike.
Policia e Shtetit ka publikuar dje listën finale me 1040 kandidatët fitues në testin me shkrim për Patrullë Policie, zhvilluar javën e shkuar në Tiranë. Sipas policisë në përfundim të vlerësimit me shkrim nga 2012 kandidatë që hynë te testi me shkrim, 1040 kandidatë kalojnë në fazën e dytë dhe tashmë do të marrin pjesë te testi fizik.
Testi me shkrim ishte 70% e vlerësimit total, pas kësaj të kualifikuarit kalojnë testet fizike, atletike, që përbëjnë 20%, të vlerësimit total dhe në fund janë intervistat, testi psikologjik, kjo është 10% e vlerësimit total. Në përfundim të gjithë procedurës, do të jenë vetëm 500 nga aplikantët që do fitojnë të drejtën për të ushtruar detyrën e Patrullës së Policisë, pasi të kenë marrë kualifikimin e duhur në Akademinë e Sigurisë. /l.m
