Deputeti Partisë Socialiste, Erion Braçe, e nisi interpelancën e sotme në Kuvend me ministren e Bujqësisë Frida Krifca me një ironi ndaj kolegëve të vetë në lidhje me qëndrimet e tij për Bujqësinë kundër qeverisë. Braçe thekson se me qëndrimet e tij ai është akuzuar si populist, dhe shton me nota ironike se me këto qëndrime të tij mërziti dhe kolegët socialist Pandeli Majko dhe Antoneta Dhima.
“Kam bërë populistin kaq kohë kam mërzitur edhe Netën edhe Pandin, keq kam bërë. Vajta i ndava unë njerëzit e zakonshëm nga elita e bujqësisë, pastaj nxita mosbesim ndaj tyre, në fakt ata nuk i njeh kush aty ku janë fshehur.
Ngrita popullin e Bujqësisë nga kokëulur në fushëlartë, duke ulur poshtë elitat filmbërëse të tregtarëve. Bëra dhe më shumë kur nxita mosbesim ndaj rregullave të lojës, më keq akoma e solla në pozitë konfliktuale që ndan bujqit nga një grup tregtaresh të bërë bashkë në një kartel.
Kaq keq kam bërë, tani do bëhem realist. Deputeti ka si qëllim votën e drejtë dhe pa lekë që pranon situatën dhe gjendjen, më mirë dhe të flasë në rrethanat e çështjes.
Bujqësia po rritet normalisht, kjo nuk është normale është e jashtëzakonshme .
Ne po rritemi dhe kjo nuk ka ndodhur më para, rritja ekonomike e Bujqësisë për tremujorin e parë na e konfirmoi këtë”, tha Braçe.
Braçe ironizoi duke marrë si shembull numrin e lopëve. Ai tha se duhet thënë se ato janë shtuar edhe pse tani hanë më shumë dhe më shtrenjtë ndërkohë që në letra zëvendësohen me qumësht pluhur dhe vaj palme.
“Nuk është normale por e jashtëzakonshme. 3% është më pak se inflacioni. U rrit qiraja e tokës. Kostoja e plugimit. U rrit kostoja e ushqimit të bagëtive. Ne e kemi më të lehtë. Hëngrën edhe lopët njëherë si te Nazari dhe SPAR-i. Nuk hëngrën. Kjo është populiste. Nuk është realiste. Lopët kundër elitës që i numëron prapë dhe i subvencionon. Numri është rritur.
Tani hanë më shumë dhe më shtrenjtë. Tani kanë edhe status. I zëvendësojnë në letra me qumësht pluhur dhe vaj palme. Por çfarë rëndësie ka lopët që janë shtuar. Po çmimet janë rritur pra dhe nuk është normale. Është e jashtëzakonshme. Tregtari po merr shumë. Madje dy tre herë më shumë se bujku. Pesë herë më shumë kur bujkut ia shtrin nën kosto. Bujku është populli. Pa çmim duhet ta lërë mallin. Çmimi bëhet me lekët kur t’i marrë te tregtari.
Paratë e bujkut i merr prodhues. I merr grumbulluesi. Me tokën e bujkut. Kjo është bujqësia që po vjen. Bujqësia e sipërmarrësve. Kjo nuk është normale. Është e jashtëzakonshme”, deklaroi ai.
/a.r
