Jo vetëm Shqipëria, por edhe Kosova është përfshirë nga dhjetëra vatra zjarri, që po kërcënojnë jo vetëm mjedisin, por edhe jetën dhe pronën e qytetarëve. Kjo në një kohë kur i gjithë rajoni i Ballkanit po përballet me temperatura mbi 30 gradë Celsius këtë javë.
Sipas Qendrës Operative të Agjencisë për Menaxhimin e Emergjencave në Kosovë, situata paraqitet serioze. Deri tani janë regjistruar 38 vatra zjarri, nga të cilat 24 janë ende aktive, ndërsa 14 janë lokalizuar.
“Sipas të dhënave të pranuara në Qendrën Operative të Agjencisë, janë regjistruar gjithsej 38 vatra zjarri në vend. Prej tyre, 24 vazhdojnë të jenë aktive, ndërsa 14 janë lokalizuar.
Menaxhimi i situatës po zhvillohet në koordinim të plotë me Njësitë Profesionale të Zjarrfikjes dhe Shpëtimit.
Agjencia shpreh mirënjohje për përkushtimin e palodhshëm të zjarrfikësve dhe angazhimin e tyre në terren në përballje me zjarret.”, thuhet në njoftimin e Qendrës Operative të Agjencisë për Menaxhimin e Emergjencave në Kosovë, lidhur me situatën e raportuar nga ora 08:00 e mëngjesit të kësaj të hëne deri në orën 14:00.
Deri më tani sipas mediave lokale, situata më e rënduar është në fshatin Kçiq të Mitrovicës, pasi aty janë djegur edhe shtëpi banimi.
Situata në Shqipëri
Ndërkohë kujtojmë se edhe situata në Shqipëri vijon të jetë e rënduar, me 38 vatra zjarri gjithsej të raportuara brenda 24 orëve, 14 prej të cilave mbeten aktive.
Vatrat aktive janë në qarqet Vlorë, Berat, Tiranë, Elbasan, Lezhë, Dibër, Durrës dhe Gjirokastër, me ndërhyrje intensive nga toka dhe ajri për vënien e tyre nën kontroll.
Agjencia Kombëtare e Mbrojtjes Civile raportoi se në operacionet për shuarjen e këtyre zjarreve janë angazhuar:
-601 forca operacionale
-68 mjete zjarrfikëse
-183 ushtarakë nga Forcat e Armatosura
-Mbështetje ajrore nga 3 helikopterë shqiptarë, një çek, një sllovak, dhe një avion “Canadair” nga Kroacia
-2 helikopterë “Black Hawk” nga Emiratet e Bashkuara Arabe
Instituti i Gjeoshkencave ka bërë me dije se sot nuk priten reshje prandaj rreziku është i lartë në të gjitha qarqet. Por në disa zona pritet rrezik shumë i lartë më konkretisht në jug të Qarkut Shkodër, veri të Qarkut Lezhë dhe Perëndim të Qarkut Elbasan. Megjithatë momentalisht situata më e vështirë paraqitet në jug të vendit, konkretisht në qarkun e Vlorës.
