Për të gjithë prindërit të cilët duhet të regjistrojnë fëmijët e tyre në arsimin parashkollor, afati kohor po afrohet.
Zhaneta Beqiri, Drejtoresha e Përgjithshme e Çerdheve dhe Kopshteve, Tiranë, ishte e ftuar këtë të hënë, 18 maj, në emisionin “Shije Shtëpie”, Tv Klan, ku dhe ndau më shumë informacione mbi procesin e regjistrimit.
Nga sot, e për dy javët në vazhdim, prindërit e fëmijëve të cilët janë në një çerdhe, do t’u duhet të plotësojnë një formular lidhur me kopshtin ku duan të regjistrojnë të vegjlit e tyre, sipas ndarjeve përkatëse të njësive. Pas plotësimit të këtij formulari, prindërit i kanë të regjistruar fëmijët e tyre në kopsht.
“Fillimisht, duke filluar nga data 18 që është sot, për dy javë të gjithë prindërit, fëmijët e të cilëve janë në çerdhet e Tiranës, në ambientin e çerdhës plotësojnë një formular, dëshirën e tyre për një nga kopshtet e njësisë së vet dhe bëhet kalimi çerdhja në kopsht. Momenti i parë në Drejtorinë e Çerdheve dhe Kopshteve korrespondon me kalimin e fëmijëve që mbushin 3 vjeç deri më 15 shtator në kopsht. I gjithë ky proces do të zgjasë për dy javë. Në këtë moment prindërit i kanë të regjistruar fëmijët në një nga kopshtet e njësisë së tyre”, tha ajo.
Faza e dytë e regjistrimeve nis nga 25 maji dhe afati do të jetë i vlefshëm për tre javë, nga data 25 maj deri më 15 qershor. Kjo është faza e regjistrimit të fëmijëve në çerdhe, ku duhet të paraqiten me certifikatën e të miturit, atë familjare dhe vërtetimet e punës.
Sakaq, nga data 15 qershor deri më 15 korrik, do të jetë afati i radhës së regjistrimit për në kopshte. Në këtë fazë, prindërit do duhet të bëjnë regjistrimin direkt në ambientet e kopshteve ku do çojnë fëmijët.
“Momenti i dytë është në datën 25 maj për tre javë. Fëmijët që vijnë në çerdhe për herë të parë, prindërit që janë të interesuar do të paraqiten në çerdhet e njësisë së tyre. Dokumentacioni që do kenë me vete: certifikata e fëmijës, certifikata familjare dhe dy vërtetimet e punës. Procesi do të zgjasë për tre javë, nga data 25 maj deri më 15 qershor. Dhe nga data 15 qershor deri më 15 korrik, prindërit e fëmijëve që do fillojnë të frekuentojnë kopshtin për herë të parë do të paraqiten në ambientet e kopshteve”, tha ajo.
Por, këtë vit regjistrimet nuk do të jenë më online për shkak të problematikave të hasura herën e kaluar. Beqiri sqaron se regjistrimet do të kryhen fizikisht nga prindërit në ambientet e çerdheve dhe kopshteve. Orari për regjistrimet do të jetë 09:00-14:00.
“Vjet, Drejtoria e Çerdheve dhe Kopshteve aplikimin e ka realizuar online. Duke parë dhe duke vlerësuar që platforma hasi në shumë problematika, sa i takon faktit se qëllimi i platformës ishte që prindërit të kishin akses, të ishte aplikimi komod, nga shtëpia, i shpejtë, pa u paraqitur në ambientin e çerdhes apo kopshtit, rezultoi se kishte problematika. Problematika në mosshfaqjen e aplikimit, mosbashkëngjitjen e dokumentacionit dhe vijmë në atë momentin e shtatorit që prindërit mendonin se ishin regjistruar fëmijët e tyre, ndërkohë që ne nuk kishim asnjë të dhënë në sistem. Për të shmangur këto problematika, është menduar që këtë vit të vazhdohet me aplikimin siç ka qenë edhe më parë, në ambientin e çerdhes dhe kopshtit, që me të vërtetë do të kërkojë kohë fizike për prindërit nga ora 09:00 deri në 14:00, por paralelisht është një mundësi që prindi të vizitojë ambientin e çerdhes dhe të kopshtit ku do t’ia besojë atij ambienti tetë orë fëmijën e vet”, sqaroi ajo.
