Çfarë dhurate i blen një njeriu që është në koma për më tepër se 30 vjet? Kjo është pyetje që familja e ish-përfaqësuesit të Francës, Jean-Pierre Adams, jeta e të cilit u përmbys brutalisht në vitin 1982, e shtron çdo vit në përvjetorët kyç. Plot 33 vjet më parë futbollisti, atëbotë 34-vjeçar, kishte shkuar në një spital në Lyon për të bërë një operim rutinë, pasi kishte probleme me gjurin, raporton CNN. Por, pas atij operimi, ai më nuk ka mundur të flasë, të ecë apo të lëvizë gjymtyrët e veta, përcjell Koha Ditore. Bashkëshortja e vet, Bernadette, ka qëndruar përkrah tij që nga atëherë, duke u kujdesur çdo ditë për të në tri dekadat e fundit.
“Askush nuk harron t’i bëjë Jean-Pierret dhurata, kurdo që e ka ditëlindjen, në Krishtlindje apo në Ditën e Baballarëve”, ka thënë Bernadette. Jean-Pierre Adams 67-vjeçar mund të marrë frymë vetë, pa ndihmën e aparatit dhe ka dhomën e vet, ku kalon shumicën e ditës në një shtrat të modifikuar që normalisht e gjen në një spital. “I blejnë dhurata si fanella apo pulovra, pasi unë e vesh atë vetë në shtrat, ia ndërroj rrobat çdo ditë”, shpjegon bashkëshortja gjatë një bisede në shtëpinë e familjes në Nimes, në jug të Francës, ku ajo kujdeset për Jean-Pierren. “Unë blej gjëra në mënyrë që ai të ketë një dhomë të mirë, i blej çarçafë të mirë apo parfume”…
