Java e fundit e Ilir Metës si president. Në katër vite firmosi 68 dekrete kundër Edi Ramës

Kjo është java e fundit në të cilën Ilir Meta do të ushtrojë detyrën si President i Republikës, pasi me 24 korrik i përfundon mandati i tij i plotë 5 vjeçar.

Edhe pse i zgjedhur në 2017 nga 87 votat e socialistëve dhe deputetët e LSI-së, Meta në postin e Kreut të Shtetit gjatë viti të dytë të detyrës së tij u kthye në një “mur” për qeverinë dhe mazhorancën e Edi Ramës.

68 dekrete kundër ish-aleatit të tij ka firmosur Ilir Meta duke shkaktuar një krizë të thellë mes dy zyrtarëve më të lartë të vendit, që vite më parë kishin bashkëpunuar ngushtësisht për të ardhur në pushtet.

Konflikti institucional mes Presidentit Ilir Meta dhe Kryeministrit Edi Rama nisi 4 vite më parë kur Kreu i Shtetit doli me dekret kundër prishjes së Teatrit Kombëtar.

Refuzimi i Metës ndaj emërimit të ministrave Sandër Lleshaj në 2018 dhe Gent Cakaj në 2019 shkaktuan zemërim dhe akuza nga ana e Edi Ramës kundrejt Presidentit. Madje për këtë çështje përfunduan edhe në Gjykatën Kushtetuese.

Largimi i PD dhe LSI nga Parlamenti duke djegur mandatet e tyre nxorren më shumë në pah konfliktin institucional, por tashmë jo vetëm President-qeveri, por edhe me Kuvendin.

Akti më i paprecedentë, ishte zhdekretimi i datës së zgjedhjeve vendore, vendim për të cilin PS ndërmori një nismë për shkakrkimin e Preisdentit Ilir Meta. Por asnjëra palë nuk doli e fituar, pasi PS hyri e vetme në zgjedhjet lokale duke mos marrë parasysh dekretin  e Metës, dhe nga ana tjetër Venecia nuk i dha mbështetje ligjore socialistëve për ta shkarkuar.

Në 2 mars 2020 Meta thirri qytetarët në sheshin para Presidencës për t’i treguar forcën e tij politike Edi Ramës.

Antishpifja, zgjedhja e anëtarëve të Gjykatës Kushtetuese, ndryshimet kushtetuese për heqjen e koalicioneve parazgjedhore kanë përplasur në vazhdimësi Kreun e Shtetit me Parlamentin.

Por qëndrimi i Ilir Metës gjatë fushatës së zgjedhjeve të parlamentare të 2021 krisi më shumë marrëdhënien e Ramës me ish aletatin e tij, por sërish edhe në përpjekjen e dytë nuk arritën ta shkarkonin atë nga posti i Presidentit.

Pasi 24 korrikut Ilir Meta ka premtuar se do të kthehet aktiv në politikën shqiptare, por pa treguar nëse LSI do të jetë sërish mekanizmi i tij.

Të dielën e ardhshme Ilir Meta do t’i lirojë zyrën Bajram Begaj të propozuar dhe zgjedhur nga votat e socialistëve me 4 qershor.

Pavarësisht konfliktit me mazhorancën e majtë, Meta nuk e kundërshtoi emrin e pasardhësit të tij, madje nxitoi duke firmosur nga Stambolli lirimin nga detyra si shefit të shtabit të përgjithshëm të Forcave të Armastosura.

/a.r