Ish-ministri i Jashtëm dhe historiani Paskal Milo, i ftuar në emisionin “Të Paekspozuarit” në MCN TV, u shpreh se lufta mes Izraelit dhe Iranit është një konflikt që nuk ka vetëm përplasje interesash strategjike, por ka dhe është edhe një përplasje e vjetër kulturash, qytetërimesh. Sipas Milos, do të bënim gabim po të mendonim se janë në lojë vetëm interesat e Izraelit, por janë në lojë interesa të mëdha që në qendër të tyre kanë pozitat e SHBA-ve
“Ky është një konflikt i vjetër, nuk ka lindur këto ditë. Është një konflikt që nuk ka vetëm përplasje interesash strategjike, por ka dhe është edhe një përplasje e vjetër kulturash, qytetërimesh. Po të vijmë te Huntington duhet të vërtetojmë që ka edhe një përplasje qytetërimesh. Është një përplasje që erdhi si rrjedhojë e një parapërgatitje që u bë në Lindjen e Mesme pas asaj që ndodhi në Gaza. Të marra në tërësinë e tyre, Gaza, Hezbollahu, Huthët, Siria, kanë qenë element të lidhur me Iranin. Duke qenë se u goditën rëndë nga Izraeli, u godit edhe pozita strategjike e Iranit në rajon. Më pas erdhi goditja direkte te Irani për të arritur një objektiv të vjetër. Nuk ndodhi sot, nuk u bë ky veprim për të goditur infrastrukturën e Iranit në përgatitje të armës bërthamore, por është një operacion i madh i përgatitur prej kohësh, për të eliminuar ose mënjanuar Iranin si fuqi e madhe rajonale që u shkon ndesh interesave dhe objektivave stratgjike jo vetëm të Izraelit, sepse do të bënim gabim po të mendonim se janë në lojë vetëm interesat e Izraelit, por janë në lojë interesa të mëdha që në qendër të tyre kanë pozitat e SHBA, në këtë konjukturë të re që po krijohet pas ardhjes në shtëpinë e Bardhë të Donald Trump”- tha Milo.
