Partia Demokratike, me udhëzimin e Kryetarit Sali Berisha, do të mbështesë secilin kandidat për deputet në kërkesën për verifikim të procesit të numërimit të votave preferenciale në zgjedhjet e 11 majit.
Sekretari për çështjet ligjore dhe zgjedhore në PD, Ivi Kaso, në një intervistë për RTSH-në tha se ky proces bën transparencë për çdo kandidat të garës, të PD-së, sikundër të palës kundërshtare.
“Transparenca mbi kërkesat e kandidatëve tanë do të sjellë transparencën mbi çdo votë të numëruar për secilin kandidat që ka qenë në garë në atë njësi, zonë apo qendër votimi që kërkohet hapja e kutive”, tha Kaso.
Kjo sipërmarrje nuk pritet të ketë ndikim në ndryshim rezultati, por ndërmerret, argumenton Kaso, për të bërë autopsinë e procesit të 11 majit, që PD e cilëson farsë.
“Janë aspekte margjinale dhe teknike të cilat nuk besoj të kenë ndikuar shumë vullnetin e zgjedhësve.”, tha ai.
Partia Demokratike, tha Kaso, do të hartojë shumë shpejt raportin përfundimtar për zgjedhjet, që do t’i dorëzohet kancelarive ndërkombëtare. Pjesë integrale e raportit do të jenë edhe informacionet e kërkuara nga KQZ, veçanërisht për administrimin e votës së diasporës. Ky institucion, tha ai, ktheu përgjigje për votat e Greqisë, ku nga korrespondenca mes KQZ-së dhe DHL-së, faktohen pretendimet e Partisë Demokratike.
“Pretendimi im kryesor që fletët e votimit nuk janë shpërndarë në mënyrë të personalizuar, zgjedhësve të identifikuar nëpërmjet kartës së identitetit si edhe zgjedhësit që duhej të sillnin nënshkrimin në momentin që pajiseshin nga DHL me fletën e votimit. Ky pretendim që kemi ngritur që herët, nga materiali që na vihet në dispozicion del mëse i mbështetur”, tha Sekretari për çështjet ligjore dhe zgjedhore në PD.
DHL, tha Kaso, pranoi se në kundërshtim me marrëveshjen, zarfe me votat e diasporës mbërrijnë në vend edhe përmes kompanive të nënkontraktuara.
Sekretari për çështjet ligjore dhe zgjedhore në PD tha se demokratët do të kërkojnë hetim administrativ edhe për mungesën e 130 mijë fletëve të votimit.
