Operacioni “Rrjeti i Merimangës” i Ukrainës, i realizuar më 1 qershor 2025, është një nga sulmet më të guximshme dhe të sofistikuara të kryera deri tani në kuadër të luftës me Rusinë.
Operacioni i ukrainasve ka shkatërruar 41 avionë strategjikë rusë, duke përfshirë bombarduesit e fuqishëm me kapacitete bërthamore, dhe ka shkaktuar dëme të vlerësuara deri në 7 miliardë dollarë për Kremlinin.
Operacioni u realizua nga Shërbimi i Sigurisë i Ukrainës (SBU) dhe përfshiu përdorimin e 117 dronëve të llojit kamikaz FPV (First-Person Vieë), të cilët ishin fshehur dhe transportuar në kamionë të zakonshëm. Dronët u lëshuan nga kontejnerë të padukshëm pranë pesë bazave ajrore ruse: Belaya, Dyagilevo, Ivanovo Severny, Olenya dhe Ukrainka – disa prej të cilave ndodhen mijëra kilometra larg kufirit ukrainas, madje edhe në Siberi.
Sulmi ka pasur një shtrirje gjeografike të jashtëzakonshme, duke përfshirë pesë zona kohore të ndryshme. Sipas disa burimeve, operacioni është udhëhequr nga Artem Timofeev, një ish-DJ dhe sipërmarrës ukrainas, i cili dyshohet se ka përdorur kamionët për të transportuar dronët të fshehur si shtëpi prefabrikate.
Grupi i tij ka operuar në mënyrë të fshehtë, duke përdorur kontejnerë të padukshëm pranë bazave ajrore ruse për të lëshuar sulmet me dronë.
Ky sulm ka shkaktuar një tronditje të madhe në Moskë, duke u krahasuar me një “Pearl Harbor” të dytë për Rusinë. Në përgjigje, Rusia ka dislokuar në Detin e Zi nëndetëse bërthamore dhe ka intensifikuar mbrojtjen ajrore. Megjithatë, sulmi ka treguar dobësi të thella në mbrojtjen e thellë të territorit rus dhe ka theksuar aftësinë e Ukrainës për të realizuar operacione të sofistikuara në thellësi të territorit armik.
Sulmi ka pasur një ndikim të madh në moralin e forcave ruse dhe ka rritur mbështetjen ndërkombëtare për Ukrainën, teksa ndodhi në një moment të ndjeshëm, vetëm disa ditë para se Rusia të paraqiste kërkesat e saj në bisedimet e paqes në Stamboll.
HISTORIA E DJ
Sipas raportimeve të Daily Mail, shoferët e dyshuar që transportuan kontejnerët, dhe që më pas u gjurmuan nga blogerë, kishin treguar histori të ngjashme, pasi të gjithë thanë se morën udhëzime nga një person me emrin “Artem”.
Ata mendonin se po transportonin shtëpi prej kornizash druri, por në të vërtetë kishin lëvizur dronë kamikazë drejt pozicioneve të sulmit.
“Artemi tani kërkohet në lidhje me një akt terrorist në rajonin e Irkutskut. Katër kamionë ishin të regjistruar në emrin e tij, dhe një prej tyre ishte burimi i dronëve që u përdorën [në një sulm mbi një bazë ajrore të Putinit]”, tha një bloger pro-rus.
Sakaq, bashkëshortja e Artemit, 34-vjeçarja Ekaterina Timofeeva, dyshohet gjithashtu se e ka ndihmuar atë.
Sipas mediave pro-Kremlinit, Ekaterina e përshkruan veten si një “magjistare” dhe është autore e romaneve erotike të kategorisë së dytë.
Një apartament në qytetin Çeliabinsk është lidhur nga blogerët me çiftin, dhe aty pretendohet se Artemi është parë vetëm një javë më parë. Burime ruse thonë se Artemi ishte zhvendosur në Çeliabinsk disa vite më parë dhe kishte punuar si biznesmen.
Në dhjetor ai dyshohet se ka themeluar një kompani transporti dhe menaxhonte disa kamionë, mbulim perfekt ky për të bërë shoferët të lëviznin kontejnerët në pozicionet e dëshiruara.
Një shofer i identifikuar si Andrei M thuhet se i ka treguar hetuesve rusë se iu dha urdhër të parkonte në një kafene pranë bazës Belaya. Sapo ndaloi, çatia e kamionit të tij u hap dhe dronët nisën të fluturonin. Kontenierët e zakonshëm të ngarkesave, të parkuar në hapësira rrugore apo buzë rrugëve, nuk kishin tërhequr asnjë vëmendje.
Megjithatë, besohet se Artemi tani është jashtë vendit, duke qenë se edhe Presidenti Volodymyr Zelensky deklaroi se të gjithë ata që morën pjesë në operacionin “Rrjeti i Merimangës” janë nxjerrë me sukses nga territori rus.
Zelensky tha se shoferët u larguan nga automjetet e tyre dhe autoritetet ruse ende nuk kanë njoftuar nëse kanë bërë ndonjë arrestim.
