Italianët janë tërbuar pasi një video që tregon një turist duke gërvishtur në murin e Koloseut të lashtë të Romës emrin e tij dhe të të dashurës, qarkulloi së fundmi në rrjetet sociale dhe u bë virale.
“Ivan + Hayley 23” shkruan turisti në mur duke përdorur çelës, ndërsa një kalimtar i rastësishëm e ka filmuar dhe ka postuar videon online.
Sipas atij që e filmon data 23 në një prej tullave me gjasë tregon datën e vizitës së çiftit. Burri që gdhend në mur buzëqesh drejt kamerës kur kuptoi se po filmohej.
Nën video, një komentues shkruan: “A je serioz mor burrë? Kjo është çmenduri o njeri budalla”.
Përdorues të tjerë nxituan të komentojnë, duke shprehur zemërimin e tyre dhe gjithashtu i kërkuan personit që e postoi që ta dërgonte videon në polici, në mënyrë që vandali të arrestohej.
Nëse arrestohet, ai mund të përballet me një gjobë masive, e cila në të kaluarën ka qenë deri në 17,000 £. Ai madje mund të përballet edhe me një vit burg.
“Unë e konsideroj shumë serioze, të padenjë dhe një shenjë të paqartësisë së madhe që një turist të prishë një nga vendet më të famshme në botë, një trashëgimi historike si Koloseu, për të gdhendur emrin e të fejuarës së tij”, tha në një deklaratë, ministri i Kulturës në Itali, Gennaro Sangiuliano.
“Shpresoj që kushdo që ka bërë këtë gjest në Amfiteatrin Flavian do të identifikohet dhe sanksionohet sipas ligjeve tona”, shtoi ai.
Ndërkohë, drejtoresha e Koloseut Alfonsina Russo tha për DailyMail: “Karabinierët po punojnë për të identifikuar këtë person dhe ne do të shohim nëse mund ta ndalojmë atë”.
Po ashtu, një zëdhënës i policisë në Romë shtoi: “Ne jemi informuar për këtë incident dhe po kërkojmë të identifikojmë fajtorin dhe kur ai të kapet, do të ndëshkohet”.
Kjo nuk është hera e parë që turistët gjobiten për vandalizimin e atij që besohet të jetë amfiteatri më i madh në botë.
/a.r
