Deri në orën 19:00, pjesëmarrja në referendum ka qenë mbi 57.2%, një shifër kjo që tregon se më shumë se gjysma e zgjedhësve italianë ka votuar.
Por ka ende kohë, pasi rezultatet paraprake do të duhet të priten deri në përfundimin e mbylljes së kutive, ku në disa vende procesi do të quhet i mbaruar në orën 23:00.
Vicenca është vendi ku votimi ka qenë dhe më masivi, me rreth 68% të zgjedhësve që kanë votuar për këtë referendum që i hap rrugë ndryshimeve kushtetuese, ose i mbyll derën qeverisë së Renzit.
Në Romë përqindja e pjesëmarrjes ka arritur në 56.89% të zgjedhësve, ndërsa në Firenzen e Renzit 67.45%.
Për cfarë po votojnë Italianët, cfarë sjell referendumi dhe si janë variantet e një PO-je apo një JO-je.
Ndryshimet e propozuara përfshijnë reduktimin e fuqive të Senatit dhe gjithashtu numrit të senatorëve, nga 315 në 100. Referendumi, i organizuar nga kryeministri Matteo Renzi, bëhet për të reformuar Parlamentin, por nga shumë vetë pritet që të përdoret si një mundësi për të shprehur pakënaqësinë.
Partitë populiste në Itali, përfshirë “Lëvizjen 5 yjet” kanë bërë fushatë që njerëzit të votojnë kundër referendumit, madje duke kërkuar një tjetër referendum për euron. Kryeminstri italian Matteo Renzi ka premtuar dorëheqjen nëse humbet në referendum, ndërsa sondazhet sugjerojnë pikërisht këtë: ai nuk do t’ia dalë dot.
Por dështimi i tij në referendum shkon përtej largimit të kryeministrit të radhës. Humbja e qeverisë në referendum është një sinjal se populizmi në Europë vazhdon të rritet dhe se “Brexit” ishte vetëm shenja e parë.
Shumë votues italianë janë të pakënaqur me plogështinë ekonomike të vendit, ndërsa Europa mban frymën pezull pasi një humbje e Renzit, udhëheqësit të ekonomisë së tretë më të madhe në union, mund të lëkundë stabilitetin financiar të Eurozonës.
