Policia italiane ka kryer një operacion të gjerë kundër prostitucionit në Padova të Italisë, duke lëshuar gjashtë fletarreste për gjashtë shqiptarë. Dy prej tyre u arrestuan ditën e sotme. Ata janë Vera Hiska, 46 vjeçe dhe Mbarim Shperdhea 38 vjeç, ndërkohë që katër të tjerët janë në kërkim.
Hetimet për këtë rrjet prostitucioni kishin nisur që në muajin nëntor, kur policia kishte marrë informata se në Santa Xhustina të Padovës kishte një aktivitet të paligjshëm.
Shqiptarët kishin marrë një shtëpi komune si të pastrehë, të cilën e përdornin për prostitucion. Banorët kishin vënë re se në lagjen e tyre, dhe më konkretisht në shtëpinë e shqiptarëve hynin dhe dilnin njerëz të panjohur çdo ditë.
Sipas mediave italiane, shqiptarët përdornin vajza të reja shqiptare, nga 20 deri në 25 vjeçe për prostitucion.
Ndersa klientët ishin kryesisht të rritur të moshave 50 deri në 60 vjeç. Vera Hiska kontrollonte biznesin e paligjshëm në Padova, ndërsa Shperdhea, ndihmësi i saj kishte edhe një rrjet të vogël në Trevizo. Panorama
