Në derën e apartamentit të tyre është vendosur një dekoracion për Krishtlindjen, por për këtë familje vetëm për festë nuk mund të flitet më tashmë. 43vjeçari, i cili kishte 10 vite që jetonte në Itali ka vrarë bashkëshorten e tij me një veprim të pakontrollueshëm pasi ishte duke parë televizor shtrirë në divan. Gazeta Panorama sjell kronologjinë e ngjarjes dhe dëshminë e vrasësit.
Gjin Preducaj ka rrëfyer për prokuroren, Nadia Alessandra Calcaterra sesi një mbrëmje e zakonshme në një familje normale u kthye në një dramë. Preducaj ka treguar për prokuroren se, ndërsa ndodhej para televizorit, ka kryer një veprim të pakontrollueshëm duke marrë një thikë nga kuzhina dhe duke qëlluar bashkëshorten e tij, e cila po flinte në dhomën e gjumit.
Hetuesit thonë se, Gjini e ka varë bashkëshorten me një goditje të vetme duke i prerë asaj arterjen, gjë e cila nuk të lë dyshim për qëllimin për ta vrarë.
Pas këtij veprimi, 43 vjeçari ka tentuar të kryej vetëvrasje duke qëlluar veten me thikë në gjoks po me të njëjtën thikë. Por, plaga ishte një gërvishtje e vogël sa që ai la spitalin pas mjekimit për t’u rikthyer në burg.
Fjalët e dala nga goja e shqiptarit gjatë marrjes në pyetje ishin të pakta dhe konfuze. Gino, siç miqtë e tij e thërrasin, ka pranuar se ishte një person xheloz por nuk kishte dyshime se gruaja e tij e tradhtonte. Ai tregon se nuk e ka goditur kurrë bashkëshorten, ndërsa shton se debate kanë pasur, sidomos kohët e fundit. Hetuesit thonë se, Marjana disa ditë më parë i kishe shprehur burrit dyshime se mund të ishte shtatzënë. Ky detaj pritet të sqarohet pas autopsisë së urdhëruar nga gjykata. Gjithashtu, 43 vjeçari i është nënshtruar dhe një kontrolli për të verifikuar nëse ka përdorur drogë apo alkool.
Nga gjetjet e hetuesve rezulton se pak pas vrasjes, 43 vjeçari i ka telefonuar motrës së tij duke i thënë: “Mori fund”. Ka qenë e motra, e cila duke kuptuar situatën i ka telefonuar policisë, e cila ka shkuar në banesën e çiftit shqiptar rreth orës 04:00 të mëngjesit. Familja ishte e njohur në atë zonë. Gjini kishte emigruar në Itali 10 vite më parë bashkë me vëllain e tij.
Fqinjët tregojnë se familja ishte shumë e sjellshme dhe e edukuar dhe kurrë nuk i kishin parë të grindeshin. Ata thonë se para se të humbte punën, 43 vjeçari punonte në ndërtimin e rrugëve. “Ata ishin të mirë, askush nuk e priste këtë”, tregon njëri prej fqinjëve.
