Policia italiane ka arrestuar një 26-vjeçar shqiptar, rezident në Martignano, të cilit iu gjet kokainë dhe heroinë. Mësohet se në pranga ka rënë shtetasi Julgert Bejaj. Mediet vendase shkruajnë se në vitin 2013 ai u arrestua si pjesë e një operacioni të gjerë antidrogë. Pastaj ai u lirua nga burgu dhe u zhduk. Ose të paktën sipas medieve italiane kishte treguar kujdes që të mos binte në sytë e policisë.
Por, policia ka bërë të ditur se kohët e fundit lëvizjet e tij kishin tërhequr vëmendjen. Kështu, sapo 26-vjeçari doli nga banesa e tij, efektivët ndërhynë duke i kërkuar që t’i kontrollonin një çantë sportive që mbante në shpinë. Brenda çantës kishte rroba të ndryshme, poshtë të cilave ishte fshehur edhe 2 kilogramë heroinë. Më pas, gjatë një kontrolli në banesën e tij, policia ka gjetur në mur edhe 10 kilogramë heroinë dhe 340 gramë kokainë. Sipas hetuesve të Italisë, nëse Bejaj do ta shiste lëndën narkotike në tregun e brendshëm, vlera e saj do arrinte në 600 mijë euro.
