Prej orës 9.00 të mëngjesit të sotëm në Bazilikën e Shën Pietros, ka nisur rituali i homazheve të nderit për Papën e Nderit Benedikti i XVI, i cili u nda nga jeta mëngjesin e 31 dhjetorit.
Homazhet do të vijojnë për tre ditë rresht deri ditën e enjte 5 janar 2023, kur do të zhvillohet ceremonia e varrimit.
Mes mijëra besimtarëve në rradhë për të nderuar Papën Ratzinger ishte dhe Fatima, një myslimane me origjinë nga Afrika.
“Ishte një Papë i mirë, ishte një Profesor. Mrekulli të shohësh gjithë këta njerëz. I ngjan një pelegrinazhi” tha ajo për gazetaren e Rtv Ora, Alba Kepi..
Sa i takon ceremonialit të vdekjes, gjithçka është e re për Selinë e Shenjtë, pasi kurrë më parë nuk ka ndodhur që një Papë të celebrojë meshën e vdekjes së një Pape Nderi.
Sipas dëshirës së lënë amanet nga Papa Benedikti i XVI, ceremonia e vdekjes do të jetë e thjeshtë dhe pse do të jenë solemnimisht zyrtare.
Prej mëngjesit të 31 dhjetorit 2022 kur u nda nga jeta, e deri sot, kur mbërriti në Bazilikën e Shën Pietros, trupi i Papa Joseph Ratzinger ka qëndruar në manastirin e Mater Ecclessiae.
