Vaksinat falas kundër gripit AH3N2 janë shpërndarë në të gjithë vendin dhe qytetarët duhet t’iu drejtohen qendrave shëndetësore për tu vaksinuar, kryesisht grupet e riskut.
Apeli vjen nga Artan Simaku epidemiolog në Institutin e Shëndetit Publik.
Ai deklaron se situata aktuale e gripit AH3N2 nuk ka vend për panik por mjeti kryesor për parandalimin e gripit është vaksinimi.
Simaku sqaron se grupet me risk të popullatës janë fëmijët e vegjël mbi gjashtë muaj, gratë shtatzëna dhe personat e moshës së tretë të cilët kanë edhe probleme shoqëruese, kronike siç janë sëmundjet kronike të mushkërive, kardiovaskulare, diabet, obezitet, personat me sëmundje tumorale që marrim edhe kimioterapi dhe personat me çrregullime te tjera të imunitetit.
Duke theksuar se situata nga gripi nuk përbën rrezik dhe as rast për panik, epidemiologu rekomandon qytetarët që sapo hasin simptomat e gripit ti drejtohen mjekut të lagjes dhe jo farmacive.
“Qarkullimi i virusit të gripit është një gjë normale, e zakonshme dhe e pritshme për stinën, kështu që nuk ka vend fare për panik edhe për alarm. Aktualisht ka një numër të rritur të rasteve por ajo që theksojmë për popullatën është kontakti direkt me mjekun e familjes”, deklaron ai.
Nëse një person ndjen që ka shenja të gripit, temperaturë, skuqeje lotim sysh, kollë, dhimbje muskujsh këshilla është që të paraqitet direkt te mjeku i familjes dhe të mos shkojë në farmaci dhe të marrë një medikament dhe pastaj të presë 2,3 ditë që t’i bjerë temperatura dhe të përmirësohet, ndërkohë që përkeqësohet dhe instalohen komplikacionet dhe i sëmuri duhet të shtrohet në spital.
