Në zbatim të kuadrit ligjor për biodiversitetin dhe mbrojtjen e faunës së egër Inspektoriati Shtetëror i Mjedisit në bashkëpunim me Policinë e Shtetit ka sekuestruar ditën e djeshme dy arinj që mbaheshin në robëri në qytetin e Sarandës.
Arinjtë e vegjël, ngjyrë të murrme,rreth 5 muaj mbaheshin në kushte të mjerueshme për qëllime përfitimi në plazhet e jugut. Arinjtë u morën në dorëzim nga inspektorët e sektorit operacional ISHMP Qendër, dhe iu dorëzuan sot Kopshtit Zoologjik dhe Drejtorisë së Parqeve dhe të Rekreacionit të Bashkisë Tiranë.
Në fjalën e tij kreu i ISHMP-së, Ergys Agasi tha se: ”Në bashkëpunim me policinë e shtetit u bë i mundur arrestimi i një shtetasi që mbante në kushte të mjerueshme dy arinjtë. Ndërsa sot në një marrëvëshje të ISHMP-së me Bashkinë e Tiranës u bë i mundur, dërgimi i arinjve në Kopshtin Zoologjik në Tiranë. ISHMP vazhdon punën për gjetjen, sekuestrimin e arinjve dhe kafshëve të tjera të cilat mbahen në kundërshtim të plotë me ligjin.”
Kreu i Agjencisë së Parqeve dhe Rekreacionit z. Blendi Gonxhe u shpreh se arinjtë nga sot do të jenë në një kujdes të veçantë. “Fillimisht do të kalojnë në karantinë për t’u kontrolluar dhe vaksinuar nën kujdesin e veterinerëve dhe specialistëve”, tha ai.
Inspektimet e ISHMP-së bëhen në zbatim të kuadrit ligjor kombëtar për biodiversitetin dhe mbrojtjen e faunës së egër dhe konkretisht të dispozitave të Ligjit nr. 10006, dt. 23.10.2008 “Për mbrojtjen e faunës së egër” dhe te Ligjit nr. 9587, dt 20.7.2006 “Për mbrojtjen e biodiversitetit”, të ndryshuar.
Po në këtë kuadër Ministria e Mjedisit, ISHMP dhe AKZM kanë ndërmarrë një fushatë identifikimi të individëve të llojit ari i murrmë, lloj i mbrojtur i faunës së egër, të cilët mbahen në gjendje robërie për qëllime përfitimi.
Për herë të parë Ministria e Mjedisit ka adresuar këtë problematikë të mbartur në vite.. Gjatë këtij viti janë ndërrmarrë një sërë hapash që u konkretizuan në Mars 2016 me nënshkrimin e një Marrëveshje Bashkëpunimi midis Ministrisë së Mjedisit dhe Fondacionit “Four Paës”, i cili do te ofroje asistence teknike në ngritjen e të parës qendër strehimore për arinjtë në Shqipëri.
Paralelisht me përpjekjet për ngritjen e kësaj qendre është punuar me partnerët ndërkombëtare për strehimin dhe sistemimin e arinjve të sekuestruar deri sa edhe Shqipëria të ketë një qendër të tillë.
Në janar të këtij viti, me iniciativën e Ministrisë së Mjedisit, u realizua dhe përfundoi me sukses dërgimi i 3 arinjve që mbaheshin në robëri për në Qendrën Strehimore ARCTUROS në Follorinë të Greqisë. Në vijim te kesaj pune, në bashkëpunim me shoqatat mjedisore ARA dhe ASPBM dhe të një qendre të specializuar në Gjermani, u be i mundur dërgimi i një ariu tjetër të mbajtur në robëri. Në bashkëpunim me strehimoren Pylli i Arinjve në Prishtinë është në proces dërgimi i 5 arinjve ndërsa Parku i Abrucos në Itali do të strehojë një arushe 6-7 vjecare të konfiskuar në Nartë të Vlorës.
Nëpërmjet hartimit të politikave të saj dhe hapave konkretë deri më sot,për mbrojtjen e faunës së egër, Ministria e Mjedisit është duke përmbushur detyrimet që rrjedhin nga Konventat në fushën e mbrojtjes së natyrës si: Konventa e Bernës “Për ruajtjen e jetës së egër dhe të habitateve natyrore evropiane” dhe Konventa e Biodiversitetit (CBD)./atsh/a.k
